دڤێت جیهان ژ چه‌کێن ئه‌تۆمی بهێته پاقژ کرن
ئەڤرۆ
ب، سه‌رجان مەحمود:
ئانتۆنیۆ گوتێرێز سکرتێرێ گشتی یێ نه‌ته‌وێن ئێکگرتی د داخۆیانیەکێ دا ل وەلاتێ یابانێ راگه‌هاند کو هه‌موو جیهان ل هیرۆشیما ئه‌نجامێن خراب یێن چه‌کێ ئه‌تۆمی دیتن و گۆت: (هه‌موو وەلاتێن جیهانێ پێکڤه دشێن جیهانێ ژ چه‌کێ ئه‌تۆمی پاقژ بکه‌ن، چونکی چه‌کێ ئه‌تۆمی به‌رده‌وام گه‌فه‌کا مه‌ترسیدار ل سه‌ر هه‌موو جیهانێ دروست دکه‌ت و بۆ ڤێ چه‌ندێ دڤێت ئه‌م پێکڤه بۆ نه‌مانا چه‌کێ ئه‌تۆمی کار بکەین).
سکرتێرێ گشتی یێ نه‌ته‌وێن ئێکگرتی هه‌روه‌سا نەرازیبوونا خوە ل هەمبەر هەلوەستێ کۆریا باکور ژی راگەهاند و دیار کر کۆریا باکور به‌رده‌وام هه‌ول دده‌ت چه‌کێ ئه‌تۆمی دروست بکه‌ت و مخابن بێی راوه‌ستیان چه‌کێن ئه‌تۆمی تاقی دکه‌ت و گۆت: (وەکو نەتەوێن ئێکگرتی ئەم هەلوەستێ بەرپرسێن کۆریا باکور ب توندی شەرمزار دکەین، هەلوەستێ کۆریا باکور د خزمەتا مرۆڤاتیێ دا نینە، دڤێت بەرپرسێن کۆریا باکور دەست ژ دروستکرنا چەکێ ئەتۆمی بەردەن، پێدڤیا جیهانێ ب چەکێ ئەتۆمی نینە، پێدڤیا جیهانێ نها پتر ژ هەر دەمەکێ ب ئاشتیێ هەیە و دڤێت ئەم پێکڤە بۆ ئاشتی و ئارامیێ کار بکەین، ژ بەر هندێ ژی هەبوونا چەکێ ئەتۆمی مەترسیەکا گەلەک مەزنە و دڤێت ئەم کار بکەین دا جیهانێ ژ چەکێ ئەتۆمی و قەدەغەکری پاقژ بکەین).
ناڤهاتی د دووماهیا ئاخڤتنا خوه دا ژی ژ ئه‌مریکا، رۆسیا و وه‌لاتێن G7 خوا‌ست کو پێکڤه کار بکه‌ن و جیهانێ د ناڤبه‌را خوه دا نه‌کەنە دو پارچه و گۆت: (رۆژ ب رۆژێ دو پارچه‌بوونا د ناڤبه‌را وه‌لاتێن جیهانێ دا کوورتر دبیت و دو پارچه‌ی خزمه‌تا ئارامی، دیموکراسی و ئاشتیا جیهانێ ناکه‌ت، وەکو نەتەوێن ئێکگرتی مە دڤێت ئەم خزمەتا مرۆڤاتیێ بکەین، ئەڤرۆکە پتر ژ هەر دەمەکێ مەترسی ل سەر مرۆڤاتیێ دروست بووینە، دڤێت ئەم پێکڤە جیهانێ بپارێزین).
