دڤێت خوه ل ڤه‌گه‌راندنا ئه‌رشیفێ رادیویا كوردى ل به‌غدا بكه‌ینه خودان
رادیۆیا كوردى یا جمهوریه‌تا عیراقێ ل به‌غدا كو ل رۆژا 29/1/1939 هاتیه دامه‌زراندن، رۆژى 15 خوله‌كا دهاته په‌خشكرن، پاشى ده‌مێ وێ هێدى هێدى هاته زێده‌كرن ل گه‌ل هندێ به‌رنامێن وێ ژى هاتنه زێده‌كرن پاشى مامۆستا و نڤیسه‌ر و ئه‌دیب و هونه‌رمه‌ند و سترانبێژێن كورد یێن ره‌سه‌ن پشكدارى د ڤان به‌رنامێن هه‌مه‌ره‌نگ دا دكرن, ل گه‌ل ڤێ چه‌ندێ ده‌مێ وێ زێده‌تر لێهات، دشێین بێژین ده‌نگێ ڤێ رادیۆیێ گه‌هشته هه‌رچار پارچێن كوردستانێ هشیاریه‌ك دا ملله‌تێ كورد ب تایبه‌تى ژ لایێ هونه‌رى و ئه‌ده‌بیڤه, وه‌كو قوتابخانه‌كا زمانێ كوردى دیاربوو بۆ وى ده‌مێ ملله‌تێ كورد ل ژێر دكتاتۆریێ و چه‌وساندنێ بوو، ل سه‌رڤێ چه‌ندێ را گوهدارێن ڤێ رادیویێ رۆژ بۆ روژێ زێده‌بوون، سه‌ره‌راى وێ چه‌ندێ كو گه‌له‌ك به‌رنامێن ڤێ رادیۆیێ ب تایبه‌تى پشتى شۆره‌شا ئیلۆنێ و گولانێ پتر خزمه‌تا ملله‌تێ مه بوون و د گه‌له‌ك به‌رنامان دا دیاربوو وه‌كى مه‌ته‌له‌كا كوردى دبێژیت: (ده‌رو بۆ ته دبێژم پشتده‌رۆ گوهێ خوه بده‌یێ).
پشتى هلبوونا شۆره‌شا گولانێ گه‌له‌ك شاعیر و هۆزانڤانان ب دله‌كێ سۆتى و ب چاڤێن پرى رۆندك هۆزانێن نه‌ته‌وه‌یى و شۆره‌شگێرى ڤه‌هاندان و هه‌ر زوه سترانبێژێن گه‌نج و كوردپه‌روه‌ر خوه ل وان هۆزانێن نه‌ته‌وه‌یى و شۆره‌شگێرى كرنه خودان و ب ده‌نگێ خوه یێ زه‌لال ب رێیا ڤێ رادیۆیا كوردى به‌لاڤ دكرن، یا دیار و ئاشكرابوو، به‌رێ گه‌نج و جه‌ماوه‌رێ ملله‌تێ كورد دا رێكا شۆره‌ش و خه‌باتا چه‌كدارى و سیاسى و رێكخستنێ، به‌لێ سیخورێن رژێما عیراقێ ژ به‌ر به‌رفره‌هبوونا كارتێكرنا ڤێ رادیویێ، ده‌ست ب پیلانێن خوه كرن و بۆ نموونه ژبه‌ر سترانێن هونه‌رمه‌ندێ نه‌مر ئه‌یاز یوسف یێن نه‌ته‌وایه‌تى و فلكلۆرى رابوون دربه‌كا كوژه‌ك ل گیانێ ئه‌یازى دان و ل رۆژا 20ـ1ـ1986 گیانێ خوه ژ ده‌ستداى، یا دیار و به‌رچاڤ بوو كو د وى ده‌می دا سه‌یدایێ نڤیسه‌ر و بێژه‌رێ رادیۆیا كوردى ل به‌غدا (جه‌مال سلێمان به‌روارى) رۆل و ده‌لیڤه‌كا به‌رفره‌هتر دا ده‌نگوباسێ مرنا خودێ ژێ رازى ئه‌یازى و پتر چار ده‌مژمێران به‌رنامێ دگه‌ل گوهدرا بۆ مرنا ئه‌یازى به‌رهه‌ڤ كر، رۆژێ ب سه‌دان تێله‌فونێن جودا جودا بۆ وى به‌رنامه‌ى دچوون, ئه‌ڤه ژى هه‌ر ژبه‌ر وان سترانێن نه‌ته‌وه‌یى و شۆره‌شگێرى بوو كو سه‌یدا جه‌مال به‌روارى ئه‌ڤ ده‌مێ درێژ و گه‌رم بۆ ته‌رخان كرى كو جه‌ماوه‌رى قه‌هرا خوه پێ ڤه‌دره‌ڤاند, د وان كاودانێن نازكدا و ل ناڤ جه‌رگێ دوژمنى و فاشستێن سه‌دام حسێنى دا.
دیسا دوى ده‌مى دا ئه‌م كۆمه‌كا هه‌ڤالێن پێشمه‌رگێن پارتى دیمۆكراتى كوردستان ل سه‌ر ئاستێ شۆره‌شا گولانێ ل په‌یمانگه‌ها كادران یا هه‌شتێ دابوون ل ئیرانێ ل باره‌گایێ مه‌كته‌با سیاسى ل راژان، ده‌مێ مه ده‌نگوباسێ مرنا خودێ ژێ رازى (ئه‌یاز یوسڤى) گولێ بووى، هشیار زێبارى ل وى ده‌مى به‌رپرسێ راگه‌هاندنا پارتى دیمۆكراتى كوردستان بوو داخواز ژ مه وان هه‌ڤالێن كادرێن په‌یمانگه‌ها هه‌شتێ كر كانێ كیش ژ مه تشته‌كێ ل ژیاننامه و كارێ (ئه‌یاز یوسف) دزانن بده‌نه مه دا ئه‌و ژى ل ده‌نگێ كوردستانا عیراقێ به‌لاڤ كه‌ن و پتر قیمه‌تێ پێ بده‌ن, ل بیرامنه من و كاك حه‌سن مه‌جید شه‌ره‌فانى ده‌ستێ خوه بلند كر، سه‌یدایێ هشیار گۆت: هه‌ر ئێك ژهه‌وه بۆ مه كورتیه‌كێ بنڤیسن دا ئه‌م ژى ژ لایێ خوه به‌لاڤ كه‌ین و مه‌ژى هه‌ر ئێكێ ل دووڤ پێزانینێن خوه بۆ نڤیسى و هه‌ر وێ ئێڤاریێ بابه‌تێ مرنا ئه‌یازى چه‌ند جاران و دوباره و سێ باره ل ده‌نگێ كوردستانا عیراقێ به‌لاڤ بوو، یا دیار بوو گه‌له‌ك كادرێ راگه‌هاندنا رادیویا كوردى ل به‌غدا هه‌بوون, مرۆڤێن باش و كوردپه‌روه‌ر هه‌بوون, لێ مخابن ل ناڤ دوژمنى دابوون، نه‌شیان وه‌كو وان دڤیا كار بكه‌ن, به‌لێ كارێ وان یێ باش پتر بوو بۆ ملله‌تى، مخابن پشتى سه‌رهلدانێ و ب تایبه‌تى پشتى حوكمه‌تا سه‌دام ژ ناڤچووى، وه‌كو دیار كه‌سێ خوه ل رادیویا كوردى و ئه‌رشیفا وێ نه‌كره خودان داكو ئه‌رشیفا وان 60 سالا كوم ڤه‌كه‌ت و نوكه پتر رادیۆیێن مه و ده‌زگه‌هێن مه پێ زه‌نگین بكه‌ن, ژبه‌ر ڤێ چه‌ندێ جهێ پێشنیارێیه كو نوكه ژى رێڤه‌به‌ریا گشتیا ره‌وشه‌نبیرى و راگه‌هاندنێ ل دهوكێ كادرێ رادیویا كوردى ل به‌غدا ئه‌وێن هاتینه دهۆكێ وه‌كى جمال به‌روارى و هه‌ڤالێن وى كۆم بكه‌ن و راوێژێ ب وان و چاوانیا ڤه‌گه‌راندنا ئه‌رشیفا وێ رادیۆیێ بكه‌ن كو دێ بیته به‌رهه‌مه‌ك ژى بۆ پتر زه‌نگینكرنا رادیۆ و ده‌زگایێن راگه‌هاندنێ یێن دهۆكێ و هه‌رێما كوردستانێ .
