دڤێت د وەرزێ هاڤینێ دا پلان بۆ زارۆكی بهێنە دانان
ئاواز یوسف:
زارۆك لاپەرەكێ سپیە دایك و بابا چاوا بڤێت دشێن ب وی شێوەی پاشەروژا وی ئاڤا بكەن، سەبارەت سەرەدەریكرنا ل گەل زارۆكی رێڤەبەرا رێڤەبەریا مەشق و راهێنانان دیار كر كو د وەرزێ هاڤینێ دا دڤێت پلان بۆ پاشەروژا زارۆكی بهێنە دانان.
ئاواز ئەحمەد رێڤەبەرا رێڤەبەریا مەشق و راهێنانان ل پارێزگەها دهوكێ دیار كر كو زارۆك لاپەرەكێ سپیە دایك و بابا چاوا دڤێت دشێن ب وی شێوەی بۆ پاشەروژێ ئاڤا بكەن، هەر كەسەكێ تەمەنێ وی بچوكتر بیت ژ هەژدە سالیێ ئەو دبیتە زارۆك و زارۆكی مافێ هەی ب ژیانەكا ئاسایی د جڤاكی دا بژیت، سەرەدەریكرنێ ژ زارۆكەكی بۆ زارۆكەكێ دی جوداهیا خۆ هەیە.
ئاوازێ نمونەك ئینا و گوت: (سەرەدەریا من ل گەل زارۆكێ من یێ ئێكێ و یێ دویێ و سێ یێ جوداهیا خۆە هەبو من نەدزانی ب چ شێوە زارۆكێ خۆ یێ ئێكێ پەروەردە بكەم من گەلەك جاران ب توەری سەرەدەری ل گەل دكر، هەر زارۆكەك د پەروەردەكێ و ژینگەهەكێ دا رادبیت و مەزن دبیت و كارتێكرن ل پاشەروژا وی دهێتە كرن، ژبەرهندێ سەرەدەری ژ زارۆكەكی بو زارۆكەكێ دی جوداهیا خۆ هەیە).
سەبارەت سەرەدەریا ل گەل زارۆكان رێڤەبەرا مەشق و راهێنانان دیار كر، دەمێ دبیتە بێهنڤەدانا وەرزێ هاڤینێ زارۆك وەسا هزر دكەن كو دەلیڤەیە دەمێ خۆ ب موبایل ئایپات و پلنتێشنێ ڤە بورینن، ئەڤجا پێدڤیە دەستپێكا هاتنا وەرزێ هاڤینێ دایك و باب خشتەكی یان پلانەكێ بۆ زارۆكێ خۆە بدانن كا دێ زارۆكێ وان د وەرزێ هاڤینێ دا دەمێ خۆە ب چ شێوە بورینیت و چاوا مفای ژ وەرزێ هاڤینێ بینیت و گۆت: (بتایبەت د وی بواری دا یێ ئەو حەز ژێ دكەن ئانكو دایك و باب سەحكەنە زارۆكێ خۆ كا چ بەهرە ل دەڤ زارۆكێ وان هەیە د وی بواری دا كار ل سەر زارۆكێ خۆە بكەن و فرێ كەنە خۆلێن هاڤینێ و ب ڤی ئەگەری دێ زارۆكێ وان ژ ئامیرێن ئەلیكترونی دویركەڤیت، و دەمەك بو سەحكرنا یاریێن ئەلیكترونی بۆ بهێتە دانان).
ئاوازێ دیار كر ژی كو هندەك زارۆك ژی ب رێكا ئامیرێن ئەلكترونی و یوتوبی فێری زمانێ ئینگلیزیێ و گەلەك كارێن دیتر ژی بویە و گۆت: (زارۆكی گرنگیدانەكا زور دڤێت، چونكی ڤی زارۆكی مافێ هەی ل سەر دایك و بابان و چاڤدانەكا تایبەت هەبیتن و زارۆكی بوچونێن خۆە هەبن گەلەك دایك و باب زارۆكێ خۆە پاشڤە دبەن ئەو زارۆكە دەمێ مەزن دبیت نەشێت كار بكەت و نەشێت بیتە خۆدان بریار و بوچون و دێ ب كەساتیەكا لاواز ئاڤا بیت و دڤێت دایك و باب یێ ئەرێنی بیت ل گەل زارۆكێ خۆ داكو زارۆكێ وان بیتە خۆدان بریار د پاشەروژا خۆە دا).
