دڤێت د ڤێ قۆناغێ دا هەموو هێزێن کوردی پێکڤە کار بکەن
سیاسەتمەدارەکێ رۆژئاڤایێ کوردستانێ دیار دکەت، د ڤێ قۆناغێ دا گەلەک یا گرنگە هێزێن کوردی ل سووریێ و رۆژئاڤایێ کوردستانێ پێکڤە کار بکەن و سەرۆک بارزانی دەمەکە کار بۆ ئێکەتیا هەموو هێز و ئالیێن سیاسی یێن رۆژئاڤایێ کوردستانێ دکەت.
نوری بریمو سیاسەتمەدار و ئەندامێ سەرکردایەتیا پارتی دیموکراتی کوردستان سووریێ ل دۆر رەوشا نوکە یا رۆژئاڤایێ کوردستانێ و سووریێ بۆ ئەڤرۆ دیار کر، روودانێن مەزن ل سووریێ روودان ب رەنگەکی کو کەلها ٦١ سالییا رژێما بەعس ل سووریێ هاتە هەرفاندن، لێ هێشتا ژی دەستێن هێزێن هەرێمی ل سووریێ هەنە و دەستێوەردانێ د کاروبارێن سووریێ دا دکەن و هەتا ڤێ گاڤێ ژی نێرینا دەستهەلاتا نوو یا سووریێ یا ئاشکرا نینە و گۆت: ( بەلێ بەحسێ رێزگرتن و مافێن مرۆڤی دکەن هەر چەوا بیت دێ ژ رژێما بەعس یا کو ئینکارا هەبوونا کوردان و کوردایەتیێ دکر باشتر بیت ژ بەر کو رژێما بۆری گەلەک ستەم و زۆرداری ل گەلێ کورد دکر).
سەبارەت ب ئێکەتیا د ناڤبەرا هێزێن کوردی دا بریمۆی دیار کر ژ رۆژا دامەزراندنا پارتیا دیموکراتا کوردستان/ سووریێ وان رێبازا پیرۆز یا بارزانی کرینە رێک و ئارمانج و هەردەم ل گەل ئێکگرتن و ئێک هەلوەستیێ دا بووینە د ناڤبەرا کوردان دا و ئەم ل وێ باوەرێی نە دەمێ کورد ئێکگرتی بن دێ گەهنە مافێن خوە و گۆت: (مە گەلەک بزاف کرن کو د ئەنجوومەنێ نشتیمانی یێ کوردی ل سووریێ دا هەمی ئالیێن سیاسی هەبن، بەلێ پەیەدە نەهاتە د ناڤ ڤێ جڤاتێ دا و مە چەندین کۆمبوون ل هەولێر و دهۆکێ ژی ل گەل وان کر لێ مخابن دەست ژ هەلوەستێ خوە یێ شاش بەرنەدان).
ناڤهاتی سەبارەت ب پاشەروژا رۆژئاڤایێ کوردستانێ ژی دیارکر کو گرنگە مفا ژ ئەزموونا هەرێما کوردستانێ ل گەل بەغدا بهێتە وەرگرتن کو پێدڤیە پێکڤە بین، لەوما گرنگە دانوستاندن ل سەر بابەتان بهێنە کرن نەک شەر و پەڤچوون و گۆت: (مە گەلەک جاران داخواز ژ پەیەدێ کریە کو خوە ژ پەکەکێ دوور بکەت و بهێتە د ناڤ ئەنجوومەنێ نشتیمانی یێ کوردی ل سووریی دا، لێ مخابن هەتا نها وان تشتەک وەسا نەکرینە و ئەو یەک ژی نها بوویە ئاریشەکا گەلەک مەزن ل هەمبەر ئێکەتیا هێزێن کوردی ل سووریێ و رۆژئاڤایێ کوردستانێ).
ل دۆر رۆلێ سەرۆک بارزانی ل رۆژئاڤایێ کوردستانێ و سووریێ ژی نوری بریمو دیار کر، رۆلێ سەرۆک بارزانی ب بلند و گرنگ دهێتە نڕخاندن بۆ ئێکەتیا کوردان و هەڤکاریکرنا خەلکێ رۆژئاڤایێ کوردستانێ و ئازادیا کۆبانێ کو ژ ئەنجامێ سیاسەتا حەکیمانە یا سەرۆک بارزانی بوو، سەرۆک بارزانی د هەموو کۆمبوونێن ل گەل ئالیێن سیاسی ل رۆژئاڤایێ کوردستانێ بەردەوام داخوازا ئێکگرتن و ئێک هەلوەستیا هێزێن کوردی کریە.
