دڤێت رێز ل خوەسەریا رۆژئاڤایێ کوردستانێ بهێتە گرتن
سیناتۆرەکێ فرەنسی راگەهاند کو دڤێت کورد د سیستەمێ نوو یێ سووریێ دا رۆلەکێ وان یێ کارا هەبیت، هەروەسا دڤێت رێز ل خوەسەریا رۆژئاڤایێ کوردستانێ ژی بهێتە گرتن، ئێدی سەردەمەک نوو ل سووریێ دەستپێکریە و دڤێت کورد وەکو پێکهاتەکێ گرنگ ل سووریێ بگەهیتە مافێن خوە، ژ بەر ڤێ یەکێ ژی دڤێت کورد د ئاڤاکرنا سیستەمێ نوو یێ سووریێ دا خوەدان رۆل بن و گۆت: (دڤێت رێز ل خوەسەریا کوردان ل رۆژئاڤایێ کوردستانێ بهێتە گرتن، ئێدی سەردەمێ زۆرداریا ل سەر کوردان ل سووریێ ب دووماهی هاتیە و دڤێت داخوازیێن کوردان ل بەرچاڤ بهێنە وەرگرتن).
سیناتۆر رێمی فێراود ئەو یەک ژی دیار کر، کورد هەڤپەیمانێ فرەنسا نە و کوردان د شەڕێ ل دژی داعشێ ل سووریێ دا گەلەک قوربانی داینە و بێگومان دڤێت کورد بگەهنە مافێن خوە.
