دڤێت كچێن گەنج بێكاریێ بۆ خۆ ب دەلیڤە ببینن بۆ فێربوونا كارەكێ نوو
بێوار حەمدی:
چاڵاكڤانەكا جڤاكی دیار كر، یا پێدڤی یە ئەو كچێن بێكار و ب تایبەت یێن خودان باوەرنامە، ژبلی تایبەتمەندیا خۆ ل دووڤ ئارەزویەكا دی بچن، دا كۆ بۆ وان ببیتە دەلیڤە بۆ داهاتێ وان و چاڤێ وان نەمینتە ل بەردەستێ دایك و بابان. كچەكێ ژی گۆت: (هێشتا د جڤاكێ مە دا رێگری ل كاركرنا كچێ دهێتە كرن، لەوما ژی رێژەیا كاركرنێ ل دەڤ كوران پترە ژ كچان).
چیمەن رەشید، چاڵاكڤان و بەرپرسا رێكخراوا ژیندا د دیدارەكێ دا بۆ رۆژناما ئەڤرۆ گۆت: وەكۆ دیار د ڤی دەمیدا رێژەیا بێكاریێ بەرەڤ زێدەبوونێ یە بۆ هەردوو رەگەزا و ب تایبەت دەرچویێن پەیمانگەهـ و كۆلیژان، كچێن بێ باوەرنامە ژی ب تنێ كارێ ناڤ ماڵێ دكەن و پتریا وان ژی ئەون یێن شیانێن وان یێن ماددی د لاوازن و گۆت: (باشترە هەموو كچ و ب تایبەت یێن خودان باوەرنامە خۆ فێری كارەكێ نوو بكەن ژبلی تایبەتمەندیا خۆ، بەلكو ل دووڤ ئارەزویەكا دی بچن وەكو، فێركرنا كارێن دەستی، چێكرنا خارن و شریناهیان، پشكداربوونا خولا، دا كۆ بۆ وان ژی ببیتە دەلیڤە بۆ داهاتێ وان و چاڤێ وان نەمینتە ل دەستێ دایك و بابێن وان).
چیمەنێ گۆت ژی: بێگومان پشكداریا كچان د خولان دا ل دەمێ بێكاریێ گرنگیەكا مەزن هەیە، چونكی ب رێكا پشكداریا خولان دێ فێری كارەكێ نوو و ئازاد بن، ئەم ژی ب رێیا رێكخراوا خۆ (ژیندا) بزاڤان دكەین خولێن تایبەت بۆ كچێن گەنج ڤەكەین و ب ڤێ رێكێ ئەم فێری كارەكی دكەین و د هاریكارین دگەلدا تاكۆ دبنە خودان پڕۆژە، سوپاس بۆ خودێ گەلەك كچ ب رێكا ڤێ رێكخراوێ بووینە خۆدان كار.
خەلات دوسكی، چالاكڤانا جڤاكی یە سەبارەت كاركرنێ گۆت: كاركرن پێدڤیەكا مرۆڤی یە بۆ خۆ ئاڤاكرن و خوشگۆزەرانیا تاك و خێزانێ، هەروەسا ب هێزكرنا ئابوورێ وەڵاتیە، گەلەك یا گرنگە هەر تاكەكێ ژ مە بەرنامە و پلان و رێكخستنا دەمی و كاری هەبیت، ب تایبەت كچ ئەگەر یا بێ باوەرنامە ژی بیت دشێت هزر د بەرنامە و پڕوژەیێن بازرگانی دا بكەت و بۆ خۆ دەلیڤا كاری پەیدابكەت.
د بەردەوامیا ئاخفتنا خۆ دا خەلاتێ دیار كر، ئەگەر مرۆڤی ئارمانج د ژیانێ دا هەبن بێگومان دێ هەردەم هزر دكار و پڕۆژەیان دا كەت، هندەك جاران خواندنا پەرتوكەكێ یا بوویە ئەگەر پڕوژەیێن مەزن بهێنە دانان و گەلەك كەس یێن ژێ مفاداربووین و گۆت: (ئەركێ خێزانێ ژی ئەوە ل گوڕەیی شیان و باوەرنامێن زارۆیێن خۆ پشتەڤانیێ لێ بكەت و زارۆیێن خۆ پاشڤە نەبەن ب گۆتنا هندەك ئاخفتنا وەكی تو نەشێی وەكی فلان كەسی بی).
ئیمان خالد، كچەكا گەنج و چاڵاكڤانە دیار كر، د نوكە دا كچ پتر دەمێ خۆ ب سوشیال میدیایێ و یاریێن ئەلكترونی دبورینن، ژ بەر كو ب رێژەیەكا زۆرتر كچ د بێكارن بەرامبەر كوران، چونكی د ڤی جڤاكی دا هێشتا گەلەك ڕێگری ل هەمبەر كچێ هەنە كاربكەت و گۆت: (گەلەك یا گرنگە خێزان نەبیتە رێگر بەرامبەر پێشكەفتنا زارۆیێن خۆ و ب تایبەت كچێ، چونكی كاركرن گەلەك جوانتر و ب مفاترە ژ بێكاریێ).
ئیمانێ ئەو چەندە ژی دا زانین، ئەو كچێن دمیننە د ماڵ ڤە پتریا وان دەمێ خۆ بكارێن خەلەت ڤە دبورینن و تێكەلیا كەسێن شاش دكەن، زێدەباری هندێ ژی تووشی تێكچوونێن دەروونی دبن ژ ئەگەرێ ب تنێ بونا وان و بێكاریێ، لەوما ب دیتنا من یا پێدڤیە كچ بێكاریێ بۆ خۆ ب دەلیڤە ببینیت و خۆ فێری هندەك زمانان بكەت، ئەڤجا چ ب ڕێكا پەرتوكان بیت یان پشكداریا هندەك خولان.
گەشاو میرانی دەروچویا كولیژێ یە و بێكارە، سەبارەت بابەتی گۆت: بۆ ماوێ دوو سالایە ژ كولیژێ دەرچوویم و یا بێكارم، نە ب تنێ ئەز بەلكۆ ب سەدان گەنجێن وەكو من د بێكارن، ژبلی كۆ دامەزراندن نینە، بەلكو ب دەستڤەئینانا كاری د كەرتێ تایبەت ژی دا گەلەك ب زەحمەت كەفتیە و گۆت: (پتریا جهێن كاری یێن كەرتێ تایبەت گەنجی ب دەرفەت دبینن كۆ مووچەیەكێ كێم بدەنێ بەرامبەر دەمژمێرێن زۆڕ یێن كاركرنێ).
ل دووماهیێ ژی گەشاوێ دیار كر، د نوكە دا پتریا گەنجان و ب تایبەتی كچ د بێ كارن، ئەڤجا یا گرنگە ئەوە ڤێ بێكاریا خۆ بۆ خۆ ب دەلیڤە ببینن و دەمێ خۆ ب تشتێن ب مفا ڤە دەربازبكەن، ب تایبەت سوشیالێ دڤێت بۆ خۆ فێركرنێ بكاربینن، ئەڤجا چ فێربونا زمانان بیت یان ژی كارێن دەستی، ژ بۆ هندێ بۆ وان ببیتە جهێ مفای ل پاشەڕوژێ.
