دڤێت لەز د بەرهەڤكرنا پارچەیێن ئەردی دا بهێتە كرن
د. عەلی تەتەر، پارێزگارێ دهۆكێ دوهی 3/11/2024 كۆمبوونەكا بەرفرەهـ ل گەل دەڤەردار و رێڤەبەرێن گشتی ل سنوورێ پارێزگەهێ كر و تێدا بەحسێ بەرهەڤیێن دهێنە كرن بۆ بەلاڤكرنا پارچێن ئەردی ژ لایێ لایەنێن پەیوەندیدار و قووناغێن دووماهیێ یێن كاركرن و ئامادەكرنێ و بابەتێ خزمەتكرنێ ل ناڤ فەرمانگەهان و نەهێلانا ڕۆتینێ، نەخاسمە بۆ ب رێڤەبرنا مامەلێن وەلاتییان و چەندین بابەتێن گرێدای ب كارێ رۆژانە یێ ژیانا وەلاتیان ڤە هاتە كرن.
پاشی گەنگەشە و پرسیار و پێشنیار ژ لایێ بەرهەڤبوویان ل دۆر هەموو بابەتان هاتنە كرن.
پارێزگارێ دهۆكێ دوپاتكر، كو دڤێت لەز د ئامادەكرنا پارچیەێن ئەردی دا بهێتە كرن و ئەوێن هاتینە ئامادەكرن ب لەز و ل دووڤ رێنما و فەرمانێن كارگێری بهێنە بەلاڤكرن، هەروەسا دوپاتی ل سەر كێمكرنا ڕۆتینێ د ناڤ دام و دەزگەهێن حكومەتێ دا كر و گۆت: «دڤێت هەموو خزمەتكاری ب دادپەروەری و ب یەكسانی و ل دووڤ رێنمایان بگەهنە وەلاتییان».
دیسا هەر دوهی 3/11/2024 د. عەلی تەتەر، پارێزگارێ دهۆكێ ل كوچكا مێهڤانداریان پێشوازی ل ئەلبرێشت فون ڤیتكە، قونسلێ گشتی یێ وەلاتێ ئەلمانیا ل هەرێما كوردستانێ و شاندێ د گەل دا كر و د هەڤدیتنەكێ دا بەحسێ پەیوەندیێن دێرین و دو قولی د ناڤبەرا هەرێما كوردستانێ و ئەلمانیا دا، ب تایبەتی پەیوەندیێن ئابووری و بازرگانی و كلتۆری و چاندنێ و چاوانیا پێشئێخستنا وان پەیوەندیان هاتە كرن.
