دڤێت مافێن کوردان د دستووری دا بهێنە گەرەنتی کرن
سەرکردەکێ تورکیا ل باژێرێ ئامەدێ دیار کر، بابەتێ مافێن کوردان نابیتە ببیتە مژارەک بۆ بەرژەوەندیێن هندەک ئالیێن سیاسی، بەلکو دڤێت مافێ کوردان ل دستوورێ نوو یێ تورکیا بهێتە گەرەنتی کرن و ژ بۆ ڤێ یەکێ ژی دڤێت پەرلەمانێ تورکیا ب رۆلێ خوە رابیت.
عەلی باباجان جێگرێ بەرێ یێ سەرۆک وەزیرێن تورکیا و سەرۆکێ پارتا (دەڤا) ل باژێرێ ئامەدێ یێ باکورێ کوردستانێ راگەهاند، ئەو پشتەڤانیێ ل قۆناغا ئاشتیێ ل تورکیا دکەن، چونکی دڤێت ئێدی ل تورکیا شەڕ و توندوتیژی ب دووماهی بهێت، دڤێت سەردەمەک نوو ل تورکیا دەستپێ بکەت دا هەموو پرسێن هەی دوور ژ شەڕی و ب رێیا دانوستاندنان بهێنە چارەسەرکرن و گۆت: (بابەتێ مافێن رەوا یێن گەلێ کورد نابیت ببیتە مژارەک بۆ بەرژەوەندیێن هندەک ئالیێن سیاسی، بەلکو دڤێت ل پەرلەمانێ تورکیا پرسا کوردی بهێتە چارەسەرکرن، بابەتێ خواندنا ب زمانێ کوردی و مافێن دی یێن کوردان ژی دڤێت د دستوورێ نوو دا بهێنە گەرەنتی کرن، ژ بۆ ڤێ یەکێ ژی دڤێت هەموو هێزێن سیاسی یێن ل پەرلەمانێ تورکیا پێکڤە کار بکەن و خودان پرۆژە بن).
ناڤهاتی ئەو یەک ژی دیار کر، دڤێت سیستەمێ سیاسی یێ تورکیا بهێتە گوهۆڕین، سیستەمێ هەتا نها گەلەک زیان گەهاندیە خەلکێ تورکیا، پێدڤیا تورکیا ب گوهۆڕینێن گەلەک مەزن هەیە، گوهۆڕین تنێ ژ بەر کوردان ناهێنە کرن، بەلکو پێدڤیا هەموو تورکیا ب گوهۆڕینێ هەیە، دڤێت سیستەمێ تورکیا ببیتە سیستەمەک دیموکراتی دا هەموو پرسێن هەی بهێنە چارەسەرکرن و گۆت: (ژ بۆ سیستەمەک نوو و دیموکراتی ژی بێگومان پێدڤیا مە ب دستوورەک نوو هەیە، دڤێت دستوورەک نوو بهێتە نڤیسین کو د بەرژەوەندیا هەموو وەلاتیێن تورکیا دا بیت، نابیت دستوور تنێ ژ بۆ بەرژەوەندیا هێزەکا سیاسی بهێتە نڤیسین، ژ بۆ ڤێ یەکێ ژی پێدڤیە هەموو هێزێن سیاسی ب تایبەتی ژی پارتێن ل پەرلەمانی خودان پرۆژە بن).
سەرۆکێ پارتا (دەڤا) ئەو یەک ژی دیار کر، دڤێت ئاخڤتنا ب کوردی ل هەموو تورکیا ئازاد بیت، دەمێ پەیاما ئۆجەلانی ب کوردی هاتە خواندن گەلەک کەنالێن تورکیا هەر زوو بابەت گوهۆڕین، ئەو یەک شەرمەکا مەزنە، بۆچی ل تورکیا خواندن و نڤیسینا ب عەرەبی و گەلەک زمانێن دی یێن بیانی ئازادە لێ ژ بۆ وەلاتیێن مە، ژ بۆ برایێن مە یێ کورد قەدەغە یە، ئەو یەک شەرمەکا مەزنە.
