دڤێت هـەرێما کـوردستانێ پەیوەندیێن خـوە ل گەل ئازەربایجـانێ بهێز بکـەت
چاڤدێرەکێ سیاسی دیار دکەت نها باشترین دەمە هەرێما کوردستانێ پەیوەندیێن خوە ل گەل ئازەربایجانێ بهێز بکەت، چونکی ب سالانە کورد و ئازەری پێکڤە دژین و نها ژی ب هزاران کورد ل کۆمارا ئازەربایجانێ دژین، ژ بەر هندێ ژی بهێزبوونا پەیوەندیێن هەرێما کوردستانێ و ئازەربایجانێ گەلەک گرنگە.
هەژارێ شامل چاڤدێرێ سیاسی یێ کورد راگەهاند، سەرەدانا سەرۆکێ هەرێما کوردستانێ د رەوشا نها دا بۆ وەلاتێ ئازەربایجانێ گەلەک گرنگە، چونکی نها دەڤەرا رۆژهەلاتا ناڤین بەر ب گوهۆڕینێن مەزن ڤە دچیت و ئەو یەک دێ کاریگەریا خوە ل هەرێما کوردستانێ ژی کەت، ژ بەر هندێ گرنگە نها کورد خوە بۆ هەر گوهۆڕینەکێ بەرهەڤ بکەن، گەلەک یا گرنگە هەرێما کوردستانێ پەیوەندیێن خوە ل گەل ئازەربایجانێ بهێز بکەت، پەیوەندیێن هەر دو گەلێن کورد و ئازەری گەلەک کەڤنن و نها ل وەلاتێ ئازەربایجانێ ب هزاران کورد دژین، ڤێجا ژ بەر هندێ ژی سەرەدانا نها یا سەرۆکێ هەرێما کوردستانێ بۆ وەلاتێ ئازەربایجانێ گەلەک گرنگە.
ناڤهاتی ئەو یەک ژی دیار کر، ژ بۆ کو هەرێما کوردستانێ بشێت پێگەهێ خوە د بیاڤێن سیاسی و ئابووری دا بهێز بکەت دڤێت ل گەل وەلاتێن دەڤەرێ و ب تایبەتی ژی وەلاتێن سوڤیەتا بەرێ پەیوەندیێن خوە بهێز بکەت ب تایبەتی ژی ئازەربایجانێ، ژ بەر هندێ ئەز سەرەدانا سەرۆکێ هەرێما کوردستانێ گەلەک گرنگ دبینم و هێڤیدارم هەر دو ئالی بشێن د دەمەکێ نێزیک دا د بیاڤێن سیاسی، ئابووری و بازرگانی دا پەیوەندیێن خوە بگەهیننە ئاستەکێ هەری باش.
ل ئالیێ دی دەزگەهێن راگەهاندنا ئازەربایجانێ ژی ب گرنگی بەحسێ سەرەدانا سەرۆکێ هەریما کوردستانێ بۆ ئازەربەیجانێ کرن و راگەهاندن، ئازەربایجانێ دڤێت پەیوەندیێن خوە ل گەل هەرێما کوردستانێ بهێز بکەت، چونکی هەرێما کوردستانێ دەڤەرەکا گەلەک ئارامە ل ئیراقێ و ئازەربایجان دشێت د بیاڤێن سیاسی، ئابووری و بازرگانی دا ل گەل هەرێما کوردستانێ دەست ب قۆناغەکا نوو بکەت، هەروەسا نها ئامادەکاری بۆ هندێ ژی دهێنە کرن دا ئازەربایجان د زووترین دەم دا قونسلخانا خوە ل هەولێرێ ڤەکەت و ئەو یەک دێ بیتە ئەگەرێ هندێ هەر دو ئالی بشێن پتر هاریکاریا هەڤدو بکەن و پەیوەندیێن خوە بهێزتر بکەن.
چاڤدێرێن سیاسی ژی وەسا دبینن ژ بەر گوهۆڕینێن نها ل دەڤەرێ دڤێت هەرێما کوردستانێ ژی دەست ب بزاڤەکا مەزن یا دبلۆماسی بکەت و پەیوەندیێن خوە ل گەل وەلاتێن رۆژهەلاتا ناڤین و سوڤیەتا بەرێ بهێز بکەت، ژ بەر هندێ ژی سەرەدانا سەرۆکێ هەرێما کوردستانێ بۆ وەلاتێ ئازەربایجانێ دێ ئەنجامێن خوە یێن باش بۆ هەرێما کوردستانێ هەبن.
