دڤێت هونەرمەند بهای بدەتە كارێ خوە
هەرهین محەمەد:
شێوەكار و رۆژنامەڤان (ئەمیر محەمەد سەبری) د دیدارەكێ دا بۆ رۆژناما ئەڤرۆ گۆت: ئەگەرێ سەرەكی یێ بەرنیاس نەبوونا شێوەكاران ئەوە بهای نادەنە كەڤالان كو خەلك بكڕیت، لەورا هەردەم رەخنا من بۆ شێوەكاران ئەوە كارێ خوە بێ بها نەكەن و دڤێت هونەرمەند بهای بدەتە كارێ خوە دا یێ ب بهابیت، بۆ نموونە هەكە من كەڤالەك چێكر و بهایەكێ كێم دانا د بازاری دا ل وی دەمی ئەز یێ كارێ خوە بێ بها دكەم، لەورا ب رێژەكا كێم ژ هونەرمەندان هەنە داهێنان د شێوەكاریێ دا كربیت و كەڤالێن وان بەرنیاس ببن ل دەرڤەی وەلاتی و نافخوە و بتنێ هونەرمەند دەمێ خوە دەتە وێ چەندێ كا چ كار بكەت دا كو ژیانا خوە پێ دەرباز بكەت و هەكە داهاتەكێ باش هەبیت ل وی دەمی دێ دا هێنانی ژی كەت.
هەروەسا گۆت: ب هەموو وێرەكی ئەو كەڤال و ێنەیێن ئەز چێدكەم ل سوشیال میدیایێ بەلاڤ دكەم، چونكو كارەكێ ئەكادیمی دكەم و نە بازرگانی نە، ئانكو وێنەیێن من هونەری نە و بۆ من دەستخۆشی پترن ژ رەخنەیان و ئەو كەسێ رەخنێ دگریت سەح دكەمێ هەكە كەسەكێ هونەرمەند بیت رەخنەیا وی وەردگرم و ئەگەركەسەكێ دووری هونەری بیت بەرسڤا وی نادەم، ژبەركو ئەو دهونەری ناگەهیت.
جهێ ئاماژێ یە ناڤهاتی خودان چار پێشانگەهێن تایبەتە و دو پێشانگەه ل دهۆكێ و ئێك ل هەولێرێ و ئێك ل سلێمانیێ ڤەكرینە و دیسان پشكداری پێنچ فەستیڤالێن پەیمانگەها هونەرێن جوان بوویە.
