دڤێت پتر لەز ل پێكئینانا حوكمەتێ بهێتەكرن
عەمەر هەرگۆشی
بۆ جارا ئێكێ یە كو پشتی هەلبژارتنا پێكئینانا حوكمەتا هەرێمێ هندە گیرۆ دبیت، هەلبەت ڤێ جارێ ژ هەمی جاران پتر و ب رەنگەكی ب لەز پێدڤی ب پێكئینانا حوكمەتێ هەیە، چونكو ناڤچە ب گشتی و كوردستان و ئیراق ب تایبەتی یێن ب دۆخەكی ناجێگیر و نا ئارام دا تێدپەرن و هەرەشێن مەزن یێن ل سەر دەڤەرێ هەین و گەلێ كوردستانێ ژی یێن ل بەردەم ئاریشەیێن مەزن دا، بێگومان پێكئینا حوكمەتی دێ ئالیكاریەكا مەزن ژ لایەكی ڤە بۆ چارەسەركرنا گرفت و ئاریشەیێن خەلكێ كوردستانێ ژ لایەكی دیڤە، بەری هەلبژارتنان هەمی لایەنێن سیاسی بەڵێنێن مەزن دابوونە كوردستانیان كو دێ ب دەستەكی درێژتر د خزمەتا وەلاتی دا بن و دێ پتر بنە جهێ ئۆمێد و متمانا خەلكی، خەلك ژی ل بەندا پێكئینانا حكومەتێ نە كو گورانكاریەك ل ژیاناوا چێببیت و كوردستان ب هێزتر و دیموكراتتر دیهار بكەڤیت.
هەر رۆژەك ل ژیانا خەلكێ كوردستانێ ببۆریت ل چاڤەرێیا حوكمەتێ دا ئاریشە پتر لێ دهێن و چارەسەریا ئاریشاژی ئالۆزتر لێ دهێت.
ئەگەر حوكمەتا هەرێما كوردستانێ هەتا ڤێ گاڤێ هاتبا دامەزراندن دا نوكە گەلێ كوردستانێ ب هێزتر و كاریگەرتر دانوستانان د گەل لایەنێن ئیراقی كەن دا كو حوكمەتا عیراقێ پێك بئینن و دا شێن خواستەكێن گەلێ كوردستانێ ژی چێتر دابینكەن، جهێ داخێیە كو بێی ئەوەی لایەنێن كوردی دناڤبەرا خۆدا گرفتێن مەزن هەبن ئەو د ڤێ دەمەیدا بۆ ماوەكی هندە درێژ پێكئینانا حكومەتێ گیرۆ بكەن و چەند پۆستێن دیهار كری بكەنە هەنجەت دا دامەزراندنا حوكمەتێ پاش بئێخن.
ئەڤرۆ پێدڤیە لایەنێن كوردستانی ژ هەمی دەمەكی پتر هەست ب بەرپرسیاریەتیێ بكەن و پتر ب گیانەكی كوردایەتی دەستێ هەڤدو بگرن دا بشێن ل ئاستێ خۆزیكێن گەلێ كوردستانێدا بن و پتر متمانا خەلكێ كوردستانێ ب دەست خۆڤە بینن٠
ئەڤرۆ گەلێ كوردستانێ رێزەكا تایبەتا هەی ل ناڤ كۆربەند و جڤاكا جیهانی و كورد ب گشتی یێن كەفتیە بەرچاڤان و هەر پێنگاڤ و بزاڤەكا وان حساب بۆ دهێتەكرن، لەوما یا ب فەرە كورد ب ئەركێ سەر ملێ خۆ رابیت و پتر نیشا جیهانێ ب دەت كو مللەتەكی دیموكراتخوازە و دڤێت ببیتە هێزەكا دیارا ناڤچەی و ستوینەكا ب هێزا دیموكراتیەتێ و پاراستنا مافێن مرۆڤی ل دەڤەرێ،ل سەر هەمی لایەنێن كوردی بێویستە د هەوارا گەلێ كوردستانێ بێن هندی زویە دەست ب پێكئانینا حوكمەتێ بكەن.
ژ بۆ هندێ كو دەنگێ كوردان ل هەمی جهەكی بهێتە بهیستن و رێز ل كوردان پتر بهێتە گرتن، پێدڤیە ل سەر كوردان كو د ئێكگرتی و تەبابن و ئاریشەیێن ناڤخۆ چارەسەر بكەن دا بكارن ئاریشێن دەرڤە ژی ل گەل مللەتێن جیران چارەسەر بكەن، ئەو لێكترازان و ژ ئێك دویركەفتنە ب تنێ خزمەتا ناحەز و دوژمنێن خاكا كوردستانێ دكەت و پتر هێزێ ددەتە دوژمنێن گەلێ مە كو پتر مافێن گەلێ كوردستانێ بن پێ بكەن، یا خۆیایە كو هێزا گەلێ كوردستانێ یا د ئێكەتیا گەلێ كوردستانێ دا هەی بێی ئێكەتی و تەبایی و ئێكرێزی مللەتێ مە دێبیت نێچیرەكی ب ساناهی بۆ دوژمنان.
هیڤیا گەلێ مە ئەڤە كو ب زویترین دەم ب رەنگەكی برایانە و دلسۆزانە كورد دەستێ خۆ بئێخنە ناڤ دەستێ هەڤدو كابینا تازەیا حكومەتا هەرێمێ راگەهینن.
گەلێ كوردستانێ و لایەنێن سیاسی باش دزانن كو چ رێكەك ل پێشیا وان نینە بگەهن سەرفرازیێ ژبلی رێكا ئێكگرتن و تەبایی و ئێكرێزیێ، تاقیكرنێن بۆری ژی ئەڤ چەندیە كریە وانە بۆ گەلێ كوردستانێ كو هەر دەمەكی ئێكرێزی تەبایی د ناڤ مللەتێ مە دا هەبووبیت سەركەفتن و دەستكەفتیش یێن هەبووی و هەر دەمەكی ژی لێكترازان و ناتفاقی هەبووبیت مالوێرانی كارەسات ژی یێن هەبووی.
