دڤێت ڕاهێنەر خوە پێشبێخیت دا بشێت نفشەكێ نوو ئاڤابكەت
عەلی حاجی:
د دیدارەكێ دا جۆتیار عەلی ڕاهێنەرێ یارییا باسكێت بۆلا یانەیا زاخۆ و هاریكارێ هەلبژارتیێ لاوێن ئیراقێ دیار كر یا گرنگ ئەوە ڕاهێنەر نە بتنێ پشت بەستنێ ل سەر زانینا خوە بكەت، بەلكو دڤێت خوە پێشبێخیت پێخەمەت بشێت نڤشەكێ نوو ئاڤابكەت.
زێدەتر ناڤهاتی گۆت: وەكو ئێك ژ ڕاهێنەرێن یارییا باسكێت بۆلێ هەردەم بزاڤێ دكەم خوە پێشبێخم و ب شێوەیێ تیۆری و پراكتیكی و وەرگرتنا دووماهی پێشهاتەیێن یاریێ پێخەمەت بلندكرنا ئاستێ خوە و بێخمە د بەرژوەندییا وەرزشا باژێرێ زاخۆ دا تایبەت بۆ ئەوا یاریزانێن د ژیێن جودا، لەوما ژی بەری ماوەیەكی من پشكداری د خولەكا تایبەت یا بهێز كرنێ دا كربوو ل وەلاتێ بەحرەینێ كو ئەڤ خولە یا نێڤدەولەتی بوو، ژلایێ فدراسیۆنا یارییا باسكێت بۆلا بەحرێنێ ب هەڤكاری دگەل ئەنجوومەنێ ڕاهێنەرێن یۆرۆ لیگ هاتبوو ڕێكخستن، تەوەرێ سەرەكی یێ خولێ چاوانییا ب كارئینانا شێوازێ بەرەڤانیێ د یارییا باسكێت بۆلێ دا، ئەوا ژلایێ وانەبێژێ نێڤدەولەتی و ڕاهێنەرێ سربی ساشا ئۆپرادۆڤێچ بۆ ماوەیێ دو رۆژان ب شێوەیێ تیۆری و پراكتیكی د هاتە گۆتن.
هەروەسان ناڤهاتی گۆت: هەرچەندە جهێ خولا ڕاهێنانێ یا دوور بۆ لێ ژبەر گرنگییا وێ خولی و حەز و ڤیانا من بۆ وێ چەندێ ئەز ئاستێ خوە پێشبێخم ومفایی ب گەهینمە یاریزانێن خوە و هەر نوویاتیەكا د ڤێ یاریێ ب گەهینە یاریزانێن خوە، من مفایەكێ گەلەك باش ژێ وەرگرت.
جوتیاری ئەوچەندە ژی گۆت: هەر ڕاهێنەرەك پێدڤی ب ئەڤان جورە خولانە، دڤێت خوە پێشبێخیت دا بشێت نڤشەكێ نوو ئاڤابكەت، مە ڕاهێنەرێن باش هەنە لەوما هیڤییا من ئەوە ڕاهێنەرێن مە بزاڤێ بكەن خوە پێشبێخن.
