دڤێت کار بۆ پاراستنا کوردان ل سووریێ بهێتە کرن
ل پەرلەمانێ ئۆرۆپا روونشتنەک تایبەت ل دۆر رەوشا کوردان ل سووریێ هاتە ساز کرن و هژمارەک ژ ئەندامێن پەرلەمانێ ئۆرۆپا دیار کرن، کوردێن سووریێ د شەڕێ ل دژی داعشێ دا گەلەک قوربانی داینە و نها هێزێن شەرع ئێرشی کوردان دکەن.
ل سەر داخوازا هژمارەک زێدە ژ ئەندامێن پەرلەمانێ ئۆرۆپا روونشتنەکا تایبەت ل دۆر رەوشا کوردان ل سووریێ هاتە ساز کرن و تێدا ئەڤین ئینجیر ئەنداما پەرلەمانێ ئۆرۆپا دیار کر، دەمێ داعش ل سووریێ ببوو مەترسیەکا گەلەک مەزن و هەروەسا ل ئۆرۆپا ژی داعشێ چەندین کریارێن تیرۆرستی ئەنجام دان، وی دەمی هێزێن کوردی ئانکو هەسەدە ب جهێ هەموو جیهانێ شەرێ داعشێ کرن و کوردان گەلەک قوربانی دان و شیان داعشێ لاواز بکەن، مخابن پشتی هاتنا دەستهەلاتا شەرعی رێز ل قوربانیدانا کوردان نەهاتە گرتن و نها هێزێن جیهادی و چەکدارێن بەرێ یێن داعشێ ل سووریێ ب فەرمانا شامێ ئێرشی کوردان دکەن و جیهان ژی ل هەمبەر ئێرشێن وان بێدەنگە، دڤێت وەلاتێن ئێکەتیا ئۆرۆپا قوربانیدانا کوردان ژبیر نەکەن و گرنگە هەموو وەلاتێن ئێکەتیا ئۆرۆپا کار بۆ پاراستنا کوردێن سووریێ بکەن.
ناڤهاتیێ ئەو یەک ژی دیار کر، ئەمریکا ژ بۆ بەرژوەندیێن خوە خیانەت ل کوردان کر و ئەو ب تنێ هێلان و پشتەڤانیا شەرعی کر، هەکە پشتەڤانیا ئەمریکا نەبا هێزێن شامێ نەدشیان ئێرشی کوردان بکەن و دڤێت وەلاتێن ئێکەتیا ئۆرۆپا دەست ب سزادانا شەرعی و حوکمەتا وی بکەن و رێ نەدەن چەکدارێن توندرەو ئێرشی کوردان بکەن.
ل ئالیێ دی ئابیر سەحلانی پەرلەمانتارا سویدی ژی ب جلکێن کوردی پشکداری د روونشتنا پەرلەمانی دا کر و دیار کر، کچ و کورێن کوردان ل سووریێ د شەرێ ل دژی داعشێ دا وەکو قارەمانان شەر کرن و بوونە سیمبۆلا ژناڤبرنا داعشێ، لێ مخابن دەستهەلاتا توندرەو یا ئەحمەد شەرعی ب پشتەڤانیا ئەمریکا ئێرشی کوردێن سووریێ دکەت و وەلاتێن ئێکەتیا ئۆرۆپا ژی ل هەمبەر ئێرشێن چەکدارێن توندرەو یێن ل سەر کوردان بێدەنگن، ئەو یەک ب چو رەنگەکێ ناهێتە قەبوول کرن و دڤێت دەست ب سزادانا رژێما نها یا شامێ بهێتە کرن.
هەروەسا دوهی هژمارەک زێدە سیاسەتمەدار و ئەندامێن پەرلەمانێ بریتانیا ژی داخواز ژ حوکمەتا بریتانیا کرن، کو ل هەمبەر ئێرشێن ل سەر کوردێن سووریێ خوەدان هەلوەست بن، چونکی چەکدارێن توندرەو یێن شامێ دەست ب کوشتنا کوردان کرینە و گەلەک وەلاتیێن سڤیل ب دەستێ گرۆپێن چەکدارێن توندرەو هاتینە کوشتن، کریارێن چەکدارێن ئەحمەد شەرعی هەر وەکو یێن داعشێ نە و دڤێت بریتانیا ل هەمبەر حوکمەتا شامێ خوەدان هەلوەست بیت و دڤێت بریتانیا پشتەڤانیا کوردێن سووریێ بکەت و وان ب تنێ نەهێلیت.
