دھۆک بۆ برنا ناسناڤی دێ یاریێ کەت و زێرەڤانی دێ ته‌ماشه كه‌ت
ئەڤرۆ:
بریارە ئەڤرۆ یاریێن گەرا ٢٣ ژ خولا پلا نایاب یا ھەرێما کوردستانێ یا تەپا پێێ بھێنەکرن و د گوپیتکا یاریێن ڤێ حەفتیێ بریارە ھەردو تیمێن دھۆک و نەوروز خودانێن رێزا دوێ و سێ د لیستەیا خولێ دا ھەمبەری ئێک بەن و سەرکێشا خولێ دێ دڤێ حەفتیێ دا یا چاڤەرێکری بیت.
ل یاریگەھا زانکویا سلێمانیێ تیما نەوروز دێ مێڤانداریا یانەیا دھۆک کەت کو دڤێ یاریێ دا ئارمانجا ھەردو تیما سێ خالێن یاریێ یە کو وەکھەڤیا ڤێ یاریێ بتنێ د بەرژوەندیا تیما زێرەڤانی دا یە ل دۆر دووماھی بەرھەڤیێن یانەیا نەوروز راھێنەرێ تیمێ ئەرسەلان قادر بۆ رۆژناما ئەڤرۆ گوت: د بەرھەڤیەکا باش دانە بۆ ڤێ یاریێ و باش د زانین ھەر ئەنجامەکێ نە چاڤەرێکری دڤێ یاریێ دا دێ ژ ھەڤرکیا ناسناڤێ خولێ و رێزا دوێ ھەتارادەکی بێ باربن لەورا ھەکە ئەم ب خوازین ھەڤرکیا ناسناڤێ خولێ بکەین پێدڤی یە بتنێ ھزر ل سێ خالێن یاریێ بکەین.
ژلایەکێ دووڤە راھێنەرێ یانەیا دھۆک حازم سالح دیارکر کرنا یاریێ بەرامبەر یانەیا نەوروز ل یاریگەھا وێ یا ب سانەھی نابینت تایبەت ئەو یا ل دەلیڤەیا دووماھی دا کو یاریا مان و نەمانێ دێ کەت، سەرارای زحمەتیا ڤێ یاریێ ئەوان بتنێ ھزر ل سێ خالێن یاریێ کری یە ژبەرکو سەرکەفتنا وان دڤێ یاریێ دا دێ ھەتارادەکی رێکا وان خوشکەت بۆ برنا ناسناڤی ژبەرکو ئەو یاریێن مای یێن تیمێ بەرامبەر کەرکوک و برایەتی چو زحمەتیێ د ئەوان یاریا دا نابینت.
ژلایەکێ دووڤە تیما زاخۆ دێ ل یاریگەھا خوە مێڤانداریا یانەیا شێروانە کەت نوکە تیما زاخۆ ل رێزا چارێ پێنجێ دھێت ب ٢٩ خالان دڤێ یاریێ دا دێ بزاڤێ کەت بۆ ب سەرکەفتنێ و ب دەستڤە ئینانا رێزا چارێ د خولێ دا کو تیما پێشمەرگا ھەولێرێ دھێت ئەوا دێ یاریەکا ب زحمەت بەرامبەر یانەیا ھەولێرێ کەت ل یاریگەھا خوە و تیما ھندرین دێ بیتە مێڤانا یانەیا برایەتی تیما ھندرین ئەوا ل سێ حەفتیێن بوری ل دویڤ ئێک شیای سەرکەفتنێ توماربکەت دێ بزاڤێ کەت بۆ سەرکەفتنا چارێ ل دووڤ ئێک و پێشمەرگا سلێمانیێ د بزاڤێن دووماھیێ دا دێ مێڤانداریا یانەیا ئارارات کەت ھەر ئەنجامەکێ نە چاڤەرێکری دا بەرامبەر سەرکەفتنا کەرکوک دێ داکەفتنا پێشمەرگا سلێمانی ب فەرمی مسوگەر بیت و کو تیما کەرکوک ژی دێ بیتە مێڤانا یانەیا سلێمانیێ .