دھۆک دێ بزاڤێ کەت ل سەر کیستێ بھێزترین تیم ل عیراقێ دەربازبیت
ئەڤرۆ:
تیما تەپا پێی یا یانا دھۆک ل بەرامبەری دەستەفتەکێ مەزنە دەمێ سوباھی ل یاریگەھا خوە تیما تەپا پێی یا یانا شورتە خودانا سەرێ لیستێ و ١١ یاریکەرێن ھەلبژارتیێ نشتیمانی یێ عیراقێ ل یاریگەھا سەرەکی یا دھۆک مێڤان دکەت ژ چارچووڤێ یاریێن گەرا بەری دووماھیێ و دھۆک دێ پێدڤی ب خالەکێ بیت بو دەربازبونا قوناغا بھێت و دێ پێشکەڤیت لسەر یانێن خودانێن ملیارا.
دڤێ یاریێ دا یانا دھۆک دێ ھەمی ھەولێن خوە مەزێخیت بو نیشاندانا ئاستەکێ باش و پشتبەستن ل سەر زاخا کورێن دھۆکێ ئەوێن زێدەتری دو سالانە نە پاداشت و نەھەڤبەست و نەمووچە وەرنەگرتین و ھەروەسا دێ چاڤێ یاریکەرێن یانێ ل ھاتنا جەماوەرەکێ مەزن بیت بو زڤراندنا خوشیا ھەر وەکو یاریا بەرامبەر یانا نەفت کو جەماوەری رولەکێ مەزن ھەبوو د سەرکەفتنێ دا.
ژلایەکێ دووڤە دھۆک بو ڤێ یاریێ ھەتا رادەکی دێ یا ئارام بیت تایبەت پشتی وەکھەڤیا وێ بەرامبەر ئارارات د خولا کوردستانێ دا لێ ھەر ما ل سەرێ لیستێ و ھنگافتنا بەیار ئەبوبەکر دێ ڤالاھیەکێ پەیداکەت ژبەر زیرەکی و شارەزاییا وی.
لدور ڤێ یاریێ شرۆڤەکارێ وەرزشی وەحید رەشید بۆ رۆژناما ئەڤرۆ گوت: یاریەکا گەلەک ب زەحمەتە بو یانا ھۆک و ب دیتنا من دھۆک نەشێت ژ خالەکێ زێدەتر ژ شورتە بدەستڤە بینیت، چونکو شورتە زوربەیا یاریکەرێن وێ یێن ھەلبژارتیێ عیراقێ نە و دبینم ھەکە ب یاریکەرێن خوە یێن یەدەک یاریێ بکەت د شیاندایە دھۆک خالەکێ ژێ وەرگریت.
زێدەتر وەحیدی ئەو چەندە ژی دیارکر کو پێدڤیە راھێنەری خالێن لاوازی و ھێزا شورتە دەستنیشانکربن و ب وان یاریکەران بکەت یێ بشێن تەکتیکا وی جێبەجیکەن و دیارکر کو پێدڤیە تاریکەرێن ستایلێ وان پتر بەرەڤانی وان پشکدار بکەت و نابیت بھیچ رەنگەکی یاریا ڤەکری ل گەل شورتە بکەت.
لدووماھیێ وەحیدی گوت: ئەوا ھەتا نوکە یانا دھۆک جھێ رێزێ یە و ھەکە تیم دەربازبوو قوناغا بھێت بدیتنا من دەستکەفتەکێ مەزنە و ھەکە چو ئەنجامان ژی ل قوناغا بھێت تومار نەکەت یا نورمالە و پێدڤیە بەرپرس رێزێ لێبگرن و پاداشت بکەن.
ژلایەکێ دووڤە کاپتنێ یانا دھۆک خالد مشیر گوت: یاریکرن بەرامبەر تیمەکا وەکی شورتە نەیا بساناھی یە، لێ مە ھیڤیێن ھەین ل سەر کیستێ ونا دەربازبین و دێ ھەمی شیانانا مەزێخین جەماوەرێ خوە دلخوش بکەین.
زێدەتر خالدی گوت: مە یاریکەرێن خودان شیان یین کورێن دھۆکێ ھەنە و دێ شێن ھەڤرکیا تیما شورتە کەین، لەورا ل سەر مە ھەمیا پێدڤیە یا ژ مە بھێت بکەین بو سەرکەفتنێ یان بدەستڤە ئینانا خالەکێ و دێ چاڤێ مە ل ھاتنا پشتەڤان بیت ھەروەکی یاریێن بوری و زێدەتر.