دھۆک و زێرڤانی د بزاڤێن ب دەستڤە ئینانا سێ خالێن یاریێ دا
ئەڤرۆ:
چاڤەرێ دھێتەکرن سوباھی جارەکا دی دەست ب ھەڤرکیێن خۆلا پلا نایاب یا ھەرێما کوردستانێ بھێتەکرن پشتی بوو ماوێ 10 رۆژان یاریێن خولێ ھاتینە راوستاندن ژبەر بێنڤەدانا قوناغا ئێکێ و ئەرکێ نوونەرێن پارێزگەھێ دڤێ گەرێ دا یێ ب سانەھی نابیت دەمێ دھۆک یاریا خوە بەرامبەر شێروانە کەت و ھەردو یانێن زێرەڤانی و زاخۆ ل دەرڤەی یاریگەھێن خوە کەن
ل یاریگەھا خوە سەرکێشا خولێ تیما دھۆک مێڤانداریا یانا شێروانە کەت ئەوا ل چار یاریێن بوری دا ب سەرپەرشتیا راھێنەرێ خوە ئوسامە عەلی شیای سێ سەرکەفتنا توماربکەت ل دۆر ڤێ یاریێ راھێنەرێ یانا دھۆک حازم سالح د داخویانیەکێ دا بۆ رۆژناما ئەڤرۆ گوت: ئەرکێ مە نوکە ب زحمەتر لێ ھاتیە ژبەرکو ئەم شەرکێشێن خولێ نە و ھەر تیمەکا بەرامبەر مە بکەت دێ ب ھێز بەرامبەر مە کەت.
ناڤبری ئاماژە ب وێ چەندێ ژی کر بوو ڤێ یاریێ ئەو دێ پشت بەستنێ لسەر پێکھاتیەکێ دی کەت کو چیاواز بیت ژ پێکھاتیێ یاریا بەرامبەر تەلەبە.
ژلایەکێ دووڤە تیما زێرەڤانی خودانا دو ناسناڤێن وەرزێ بوری دێ یاریا خوە بەرامبەر یانا ھندرین کەت ل یاریگەھا وێ راھێنەرێ یانا زێرەڤانی سلێمان رەمەزان دیارکر د بەرھەڤیەکا باش دانە بوو ڤێ یاریێ و ھەر یاریەکا ئەو بکەن بوو سێ خالێن یاریێ دێ کەن ھەردیسان ل دور گوھورینا تیمێ ناڤبری دیارکر بۆ ڤێ قوناغێ ژی ئەوان پشت بەستن لسەر ھەمان یاریکەرێن خوە کری یە بتنێ ئێک یاریکەر نەبیت ئەوژی پێشرەو عەزیز ژبەر چەند کارێن وی یێن تایبەت چوی یە وەلاتێ سوید.
نوونەرا سێ یا پارێزگەھێ تیما زاخۆ دێ ل یاریگەھا دوێ یا فرەنسو حەریری بیتە مێڤانا یانا ھەولێرێ و تیما پێشمەرگا سلێمانیێ دێ بەرامبەر نەوروز کەت و تیما ئارارات دێ یاریا خوە بەرامبەر کەرکوک کەت و تیما پێشمەرگا ھەولێری ئەوا چەندین گوھورین د پێکھاتیێ خوە دا کرین دێ یاریا خوە یا ڤێ گەرێ بەرامبەر یانا برایەتی کەت.
