دۆرین ڕۆمێل: ئێكەم پشكدارییا مە یا دەرڤەیە گەشبینن بۆ دەستكەڤتەكێ دیرۆكی
ستێرا پارێزگەهێ وتیما ڤۆلی بۆلا یانەیا سەنحاریب دۆرین ڕۆمێل دیار كر بۆ جارا ئێكێ یە د دیرۆكا یانەیێ دا تیما وان یا ڤۆلی بۆلێ پشكداریێ د قارەمانییەكا دەرڤە دا بكەت و گەشبینن بۆ ب دەستڤە ئینانا دەستكەڤتەكێ دیرۆكی و باشترین نوونەرێن كوردستانێ و ئیراقێ بن د قارەمانییا رۆژئاڤا ئاسیا دان ئەوا بڕیارە هەڤركیێن وێ سوبەهی وەلاتێ كوێتێ مێڤاندارییا وێ بكەت.
زێدەتر ناڤهاتی بۆ رۆژنامەیا ئەڤرۆ گۆت: وەكو یانەیا سەنحاریب ئەم دێ هەموو بزاڤان كەین پشكدارییەكا سەركەڤتی بیت د قارەمانییا رۆژئاڤا ئاسیا دا سەرباری دبیتە جارا ئێكێ و تاقیكرنەكا نوو یا تیما مە د قارەمانییەكا دەرڤە دا و مە چو پێزانین ل سەر یانەیێن پشكدار نینن لێ گەشبینن باشترین شێوە هەڤڕكییان بكەین تایبەت بۆ ڕێزێن پێشیێ و دەستكەڤتەكێ دیرۆكی، ئەڤە ژی ب كارەكێ كۆم و پلانێن ڕێكخستی بۆ سەركەڤتنان.
دورین رۆمێلێ گۆت: پێنەڤێت هەر تیمەكا پشكداری بیت د ڤێ قارەمانیێ دا ئەو قارەمانا وەلاتێ خوەیە و شیایە ببیتە یا ئێكێ لەوما ژی هەموو تیم ب هێزن و دێ هەموو بزاڤان كەن ناسناڤی ب دەستڤە بینن ئەڤە ژی دێ بیتە قارەمانییەكا پری هەڤڕكی، لێ وەكو یانەیا سەنحاریب مە ژی هیڤی و ئارمانج هەنە و نە بتنێ بۆ پشكداریێ ئەم دێ دناڤا قارەمانیێ دا بین بەلكو هەڤڕك و هژمارەیەكا بزەحمەت بین، دبیت جوداهییا یاریزانێن پیشەكار دناڤبەرا تیما مە و یێن پشكدار هەبن وەكو كوالێت و ئاست و شیان، ژبەركو ئەو یانە خودان شیانێن دارایی نە و دبیت یێن وان باشتربن لێ هیچ شێوەیەكێ ئەم خوە كێمتر نادانین.
ل دووماهیێ ناڤهاتی پشتگەرمییا تیمێ ب ئێگكرتن دا زانین و گۆت: تیما مە ب سەرپەرشتییا د. هەكار بەرقی ڕاهێنەرێ و ب پشتەڤانییا كارگێریێ و ئێك دلی و مۆرالا بلند یا یاریزانان ئەگەرەكێ سەرەكی یە بۆ گەشبینییا سەركەڤتنان، ئەم سۆپاسییا پارێزگارێ دهۆكێ د. عەلی تەتەر دكەین كو بێ جوداهی پشتەڤانییا یانەیان دكەت و پشتەڤانییا یانەیا مە كرییە ژبۆ پشكدارییەكا سەرفەراز و سۆزێ ددەین یا د شیان دا بیت بۆ سەركەڤتنا تیمێ بكەین و دەستكەڤتەكی بۆ كوردستانێ بینن.
بۆ زانین تیما ڤۆلی بۆلا یانەیا سەنحاریب د كۆما سێیێ دا هاتیە و پێكهاتینە ژ یانەیێن نەسر یا ئوردنی، قودس یا فلەستینی و فەیحا یاسعودی، یانەیێن پشكدار ژ وەلاتێن ئوردن، فلەستین، یەمەن، لوبنان، سعودیە، قەتەر، ئیمارات و ئیراق، ئەركێ مە ب سانەهی نابیت لێ ئەم بۆ هەر یارییەكێ بتنێ سەركەڤتن ئارمانجا مەیە.
