دۆمان رەجەب: بۆ ئەنجامدانا چالاكییان ل سپۆنسەران د گەڕیێن
ئەڤرۆ
د داخویانیەكێ دا سكرتێرێ ئێكەتیا پایسكلڤانێن پارێزگەها دهۆكێ دیار كر ئەوان بەرنامەكێ رێكخستی هەیە ژبۆ دانانا بنیاتەكێ زانستی و ئەكادیمی یێ یاریزانان كو ل سەر ئاستێ ژیێن جۆدا بهێتە دەستنیشانكرن و هەكە پشتەڤانی هەبیت چالاكی و قارەمان هەنە.
زێدەتر دۆمان رەجەب سەعید بۆ رۆژناما ئەڤرۆ گۆت: ئێكەتیا پایسكلان ل پارێزگەها دهۆكێ چەند بەرنامە و پلان دارێشتینە پێخەمەت چاوانیا پێشئێخستنا وەرزشا پایسكلان تایبەت زێدەتر گرنگی دان ب یاریزانێن پارێزگەهێ ژبەركو گەنجێن هەین حەز و ڤیانا ڤێ وەرزشێ، ل دووڤ بەرنامێ مە دانانا خولێن جۆدا و قارەمانی كو دێ بیتە باشترین بەرهەڤی بۆ هەمی یاریزانان بەر دەستپێكرنا هەر خول یان قارەمانیەكا كوردستانێ و ئیراقێ، مە كۆمەكا باش ژ یاریزانێن خودان شیانە هەنە د نوكە دا دگەل یانەیێن كوردستانێ و ئیراقێ نە و پێشبینی دكەم زێدەتر یاریزان پەیدابن ئەڤچەندە ژی وێ دگەهینت وەرزشا پایسكلان بەر ب پێشڤە دچیت.
هەروەسان ناڤهاتی ئاستەنگ و ئاریشەیا مەزن كو دبیتە رێگر بۆ كار و بەرنامێ وان بڤی شێوەیی دیار كر و گۆت: هەرچەندە ژبەركو نەبوونا بووجەیا وەرزشی لێ مە چەندین بزاڤ كرینە رێكێن بازرگانی بكەین وەكو سپۆنسەر بۆ چالاكیێن مە لێ هەتا نوكە چو كۆمپانیان خوە ل چالاكیێن مە نە كرینە خودان، ئەم رژدین ل دووڤ شیانێن خوە و هەكە پشتەڤانی هەبیت دەستان ژ پلانێن خوە بەر نەدەین و مەرەما مە یا سەرەكی پشتەڤانیا یانە و یاریزانێن وێ نە پێخەمەت تیمێن وان د ئاستەكێ بلند دابن.
