دیاردەیـەكا نـەشرین
سەبحی مەلكایزی
دیاردەكا نەشرین وەك خلتەكی پێترییا مە ڤەگرتینە، ئەو ژی تێرنەبوونە ژ گرتنا وێنەیێن خۆ، بەری هەمیان ژ خۆ دبێژم، گەلەك ژ مە یێن ئەڤ خلتە لێ، رۆژێ دوسێ جار وێنەیێن خۆ د وارێن سۆشیال میدیایێ دا دئینینە خار، ئەم هزر دكەین ب ڤان وێنەیان دێ خۆ باشتر بەرنیاس كەین، هزرێ ل هندێ ناكەین هەر تشتێ زێدە مشە دبیت پێتر بێ بها دبیت، كەس نینە حەژ هەبوونا خۆ نەكەتن، لێ دبێژن خوێ ژی ب قایدە، مەهندەكا چ توخیب بۆ قایدێ نەهێلانە، من نەڤێت ناڤان ل وان هەمی تشتان بینم یێن ئەم وێنەیان ل گەل دگرین و بەڵاڤەدكەین، چونكی دێ زێدە درێژ و بێ تام بیت، ل گەل كەلوپەلێن ناڤ مالێ، جل و بەرگان، ئاڤاهی و ترومبێلان، ل بەر مەقلێن گۆشت ـ بژارتنێ، هەما بلا بەس بن دا نەبیتە چیڕۆكا ماران.
پشتی من نێڕایە مالپەڕێ خۆ و وێنەیێن خۆ نە ئێكودو و سێ مشە لێ دیتین، من زانی ئەو خلت یێ تووشی من ژی بووی، بەری ب نێڕمێ من هزردكر هەما هندەكا ئەو خلتێ لێ و ئەز یێ ساخلەمم، من گۆتە خۆ من ئەڤ وێنە ب رەخ ڤان گولانڤە گرتی، ئەو گوه ل هەر خۆدانێن جوانی و بێهنا خۆ یا خۆشن و ئەز هەر ئەڤەمە یێ هەیی، ئان ئەو وێنەیێ من د گەل جامێرێ هە گرتی، ئەو هەر خۆدانێ سالۆخەتێن خۆ یێن جوان و قەنجە و ئەز هەر لاوێ هەرم، نە چ ل من زێدەبوویە و نە چ كێماتی ب جامێرێ رێزدار.
دیارە مە هندەكان ئەو گڕێ بۆ گرتنا وێنەیان هەیە، زكاتا وی گڕی نینە بۆ ئاڤاكرنا كەساتییا خۆ، لەوا هەستكر ئاماژێ بدەمە ڤی بابەتێ خرش، ژ فەرێن فەرە هزرێ ل شەنگستێ ئاڤاكرنا كەساتییا خۆ بكەین، خۆ مژویلی كارەكێ پاقژ بكەین ب هویری و خەمخۆری و هندی د شیان دا ب بەهرەمەندی، هەبوون ب ئەڤێ پەیدا دبیت نە ب وێنەگرتنا وێنەیان ل گەل ڤی و وێ هەنێ.
نالبەندی سال ب سال ب چاكیتەكی و قوتكەكی و شەلوالەكی بوو و گۆرەكا ریسی د پێیان، لێ بێ بەڤڵە ل كوردستانێ ل هەمی وارێن ژیانا مرۆڤان و بێی ترس و شەرم د پەیڤان دا هەر تشت وێنەكری نە ل بن كەفشێ ڤی و وێ هە، دەمێ دنێڕنە وێنەیێ وی ب تدارەكا هەیی تەمەت چیا بلندە و مەزن ب زەنگینییا ڤەڕێزا هزر و قەلەمێن وی گارەی، داچاڤلێكەرێن ڤان كەسان بین كار و كەدا خۆ دا، نەیێن وەكی مە هندەكا كەسپ و كار گرتنا وێنەیان، خلتێ مە خانەنشینا ژ هەمیان دژوارترە ب رۆژ دگلداڕا و ب شەڤ ژی ب بەلاڤكرنا وێنا و رەخنە و فەلسەفەكا هەڕفتی، ب خانەنشینكرنا سێ تەمەنا پێكڤە ل دویڤ ئێك بەرپەڕێن بوارێ سۆشیال میدیایێ ب شەڤ دێ پتر ب وێنا زەنگینبن و ژبلی رەخنە و فەلسەفێن بەتالییێ بوویە كەد و رێنجبەری، لێبوورینێ ژ رێزدارێن خانەنشینێن هێژا دخوازم هەستەك لێ ئێشابیت، هیڤییە خۆدان پرۆژەیێن مفاداربن بۆ ڤەژین و گەشەپێدانێ و خلتێ مە وان نەڤەگریتن.
