دیتنا جڤاكی بۆ پشتەڤانیا ژنان گوهۆڕینێن مەزن ب خوە ڤە دیتینە
شاكر ئەتروشی:
ئەڤین سدقی حاجی، ئەنداما پشكا رەوشەنبیری و راگەهاندنێ ل سەنتەرێ پێشمەرگە یێ رەوشەنبیری، د دیدارەكێ دا بۆ رۆژنامەیا ئەڤرۆ گۆت: بەری هەر تشتەكی ئەز شانازیێ ب خوە دبەم وەك خانمەكا پێشمەرگە خزمەتا وەلاتێ خوە دكەم، سەبارەت كارێ راگەهاندنێ ژی هەر ژ هەبوونا ڤی سەنتەری حەزا كارێ راگەهاندنێ، ب تایبەت ژی پێشكێشكاریێ ل دەف من پەیدا بوویە و ب خۆشحالی ڤە هەتا نوكە وەكو پێشكێشكار من چەندین چالاكی ب رێڤەبرینە و دێ یا بەردەوامبم.
هەروەسا گۆت: راستە ل دەستپێكا هەر كارەكی هندەك ئاستەنگ و زەحمەتی هەنە، لێ ب پشتەڤانیا مالێ ئەم شیاین د بەردەوام بین و وان ئاستەنگان نەهێلین، هەروەسا دیتنا جڤاكی بۆ پشتەڤانیان ژنان گوهۆڕینێن مەزن ب خوە ڤە دیتینە، بۆ زانین بەری بهێمە ڤی سەنتەری ئەز ئێك ژ خواندەڤان و گوهدار و بینەرێن باش بووم بۆ هەر پێشهاتەكێ، لەورا دەمێ دەلیڤە هاتی ئەز هاتمە سەنتەرێ پێشمەرگە و ل ڤێرە دەرگەهێن باش بۆ من ڤە بوون كو بشێم پتر شیانێن خوە دیاربكەم، لەورا ل دەف من سەنتەرێ پێشمەرگە وێستگەها ئێكێ یە و چو جاران من نەڤیایە ل دەزگەهەكێ دی كاربكەم، لەورا دێ بەردەوام بزاڤان ژبۆ هندێ كەم شیانێن خوە پتر پێشڤەببەم، هەروەسا پێزانێن نوو د هەر بۆارەكی دا، ب تایبەت ژی د راگەهاندنێ دا ل خوە زێدەبكەم و ئومێدا من هەردەم ئەوە دەرفەت پتر بۆ ژنێ هەبن رۆلێ خوە پتر ببینیت، بەلێ رەگەز ئەگەر نەبیت بۆ ئافراندنا دەرفەتان بەلكو شیان و شانازی پیڤەربن، داكو دادپەروەری د پەیداكرنا دەلیڤەیان دا پەیدا ببیت.
