دیدارا بامەڕنێ یا ئێكێ یا ئەدەبی و رەوشەنبیری هاتە ئەنجامدان
ئامێدیێ، مەحمود نهێلی:
ل ژێر چاڤدێریا د. عەلی تەتەر، پارێزگارێ دهۆكێ و ب بەرهەڤبوونا بەهرام عریف یاسین، بەرپرسێ لقێ 18 یێ پارتی ل ئامێدیێ و وارشین سەلمان، دەڤەردارێ ئامێدیێ و هەژمارەكا بەرپرسێن میری و حزبی و ڕەوشەنبیر و نڤیسەر و شارەزایێن كلتووری، دوهی 14/10/2025 ل هۆلا ئامادەیا بامەرنێ، دیدارا بامەرنێ یا ئێكێ، ل ژێر ناڤونیشانێ (بەهدینان میراتەكێ كلتووری یێ زەنگین و دوكیۆمێنتكرنەكا سنۆردار) هاتە ئەنجامدان.
د رۆژا ئێكێ یا دیدارێ دا زێدەباری پێشكێشكرنا پەیڤا پارێزگاری و فلمەكێ دیكۆمێنتاری، چەندین پەنەل و دیدار ل دۆر كلتوور و ئەدەب و مێژوو و ئایین و زمانی و رەوشەنبیریا جڤاكی و پێكڤەژیانێ و ئاستێ رەوشەنبیریا دەڤەرێ د سەر دەمێن كەڤن دا هەتا نوكە و چەندین بابەتێن دیتر هاتنە پێشكێشكرن و دان و ستاندن ل سەر هاتە كرن.
د. عەلی تەتەر د پەیڤا خوە دا بەحسێ گرنگیا ڤان جۆرە دیدارا كر و گۆت: «پڕانیا دیرۆك و كلتوورێ كوردی و ب تایبەت یێ ڤێ دەڤەرێ نەهاتیە دیكیۆمێنتكرن و تۆماركرن، لەو سازكرنا دیدارێن ب ڤی رەنگی ژیانەڤەیێ ددەنە دەڤەرێ و كلتوور و مێژوویا پر سەروەرییا خەلكێ دەڤەرێ نوو دكەتە ڤە».
ناڤهاتی ئاماژە دا رۆلێ خەلكێ بامەرنێ د شۆڕەشێن كوردی و پێشڤەبرنا ئاستێ رەوشەنبیری
و بەرهەنگاریكرنا داگیركەران دا.
دیدار دو ڕۆژان، ئانكو ئەڤرۆ ژی دێ یا بەردوام بیت و چەندین پەنەلێن دیتر دێ هێنە پێشكێشكرن.
