دیدارا بامەڕنێ(1) ب 43 ڤەكۆلینان دێ هێتە سازكرن
شاكر ئەنروشی:
ل ژێر چاڤدێریا پارێزگارێ دهۆكێ پ.د.عەلی تەتەر و ل بن درووشمێ (بەهدینان میراتەكێ كلتۆری یێ زەنگین و دوكیومێنتكرنەكا سنۆردار) ل بەرە ل رۆژێن 14-15/10/2025 ل دەمژمێر9:30ی سپێدێ ل بامەرنێ/ ل هولا ئامادەیا بامەرنێ، دێ دیدارا بامەرنێ1 دێ دەست ب كارێن خوە كەت.
ئێك ژ رێكخەرێن ڤێ دیدارێ بۆ رۆژنامەیا ئەڤرۆ گۆت: دڤێ دیدارێ 47 ڤەكۆلەر دێ 43 ڤەكولینان پێشكێش كەن و ئەڤ ڤەكۆلینێن هەنێ ل سەر نەهـ پەنەلان هاتینە دابەشكرنێ، كو هندەك ژوان ڤەكۆلینان ب هەڤپشك هاتینە دروستكرن.
د. رێنجبەر جەمیل شێخوی زێدەتر گۆت: مە یا هەولدای ئەڤ ڤەكۆلینە دەربڕینێ ژ كەتوار و كلتۆرێ دەڤەرا بەهدینان هەموویێ بكەن و ئەڤ ڤەكۆلینە ل سەر چەندین تەوەران هاتینە دابەشكرن، وەك (یاسا، سیاسەت، ئابوور، كەسایەتی و دەڤەر، كلتۆر و جڤاك، شوونوار و مێژوویا سیاسی، زمان و ئەدەب) و ڤەكۆلین دێ ب هەردو زمانان كوردی و عەرەبی بن.
هەر لدوور ڤێ دیدارێ عەبدولرەحمان بامەرنی، دبێژیت: ڤەكۆلینێن ڤێ دیدارێ هەموو دناڤ دو پەرتووكان دا هاتینە چاپكرن و دێ ل سەر ڤەكۆلەر و بەشداربوویان هێنە بەلاڤكرن، دیسان ل شەڤا 14 ل سەر 15ێ دێ مە شەڤبێریەكا كوردەواری هەبیت و چەندین بڕگەیێن هونەری و كلتۆری و رەوشەنبیری ب خوە ڤەگریت.
