دیدارا سێیێ یا ئەدەبێ ژنان ئەڤرۆ دێ ب دووماهی هێت
شاكر ئەنروشی:
ب پشتەڤانیا رێزدار (پ.د عەلی تەتەر) پارێزگەرێ دهۆكێ و ل ژێر دروشمێ (ئاڤاكرنا هزران و فڕینا هەستان د ئەسمانێ ئەدەبیاتێ دا) رێڤەبەرییا گشتی یا رەوشەنبیری و هونەری ل پارێزگەها دهۆكێ، رێڤەبەرییا چالاكیێن وێژەیی، دوهی رۆژا دوشەمبی رێكەفتی 13/10/2025 ل دەمژمێر دەهی سپێدێ دەست ب گێڕانا (دیدارا سێیێ یا ئەدەبێ ژنان) كر و هەتا ئەڤرۆ ئێڤاری دێ یا بەردەوام بیت و چالاكی ل هولا ئۆتێلا ژیان دهێنە كرن.
پشتی راوەستیان دەقیقەكێ وەك رێزگرتن ل سەر گیانێ شەهیدان و سەروەرێ وان بارزانیێ نەمر، پەیڤا رێڤەبەرییا گشتی یا رەوشەنبیری و هونەری ل پارێزگەها دهۆكێ ژلایێ خانم (عائیشا شەوكەت) جێگرا رێڤەبەرێ گشتی یێ رەوشەنبیری و هونەری و پەیڤا رێزدار(پ.د. عەلی تەتەر) پارێزگەرێ دهۆكێ هاتە خواندن و تێدا دەستخۆشی ل رێڤەبەرییا گشتی یا رەوشەنبیری و هونەری ل پارێزگەها دهۆكێ، رێڤەبەرییا چالاكیێن وێژەیی و ستافێ رێكخستنا ڤێ دیدارێ كر و پشتەڤانیا گارگێڕیا پارێزگەهێ و حكومەتا هەرێما كوردستانێ بۆ ڤێ دیدارێ و هەموو بزاڤ و چالاكیێن ئەدەبی و رەوشەنبیری ل سنۆرێ پارێزگەها دهۆكێ دوپاتكر.
پاشان چەند پارچەیێن مۆزیكێ ژلایێ هونەرمەندێ مۆزیكژەن (جەمال محەمەد ئەدیب) ڤە هاتنە ژەنین و د پەنەلێ ئێكێ دا سێ سمینار ژلایێ (د. سەلوا فەریق سالح، د.حەمزە شۆشی، م. سینەم چێی) هاتنە پێشكێشكرن و پەنەل ژلایێ نڤیسەر(محەمەد عەبدوللا زێباری) هاتە ب رێڤەبرن، د پەنەلێ دویێ ژی دا كو ل دانێ ئێڤاری بوو، چار سمینارێن ژلایێ (د. پەروین رەئۆف، د. سارا زەید مەحموود، م. پەیڤین نسرەت، م. ڤیان عەباس) هاتنە پێشكێشكرن و پەنەل ژلایێ (كەژال محەمەد) ڤە هاتە برێڤەبرن، د دووڤدا گەشتەك بۆ پشكدار و بەرهەڤبوویان هاتە رێكخستن و چوونە ئیدارەیا سەربەخۆیا زاخۆ و ل وێرێ سەرەدانا هندەك جهێن گەشتیاری و شوونواران كرن و ل بەرە ئەڤرۆ 14/10/2025 رۆژا دویێ و دووماهیێ ژ دیدارێ چەند سمینار و چالاكیێن دی بهێنە گێڕان، هەروەسا دێ ئێڤاریەكا هەلبەستخواندنێ ب پشكداریا هژمارەكا هەلبەستڤانێن ژن ژ هەر چار پارچەیێن كوردستانێ هێتە گێڕان و ل دووماهیێ دێ خەلات و باوەرنامەیێن رێزلێنانێ ل سەر پشكداران دێ هێنە بەلاڤكرن.