دیدارا چارەنڤیساز بۆ ریالێ و مان ستی و یۆڤانتۆس بەرانبەر ئاستەنگا ئایندهۆڤن
پرانییا جەماوەرێ وەرزشی ل جیهانی چاڤەڕێ دیدارێن ئاگرین و چارەنڤیس دا یێن هەشت یانەیێن مایی ژ چارچووڤەیێ قۆناغا پاشگۆ یا دەربازبوونێ و ڤەبر بۆ قۆناغا 16ێ ژ قارەمانییا یانەیێن ئۆرۆپا قارەمانێن خولا چامپیۆنز لی و یارییا ریال مەدرید و مانچستەر ستی كۆپیتكا یاریێن ئەڤ شەڤەیە و پاریسێ و بۆرۆسیا دۆرتمۆندێ پێنگاڤێن باش بۆ قۆناغا داهاتی هاڤێژتینە.
ریال مەدرید- مانچستەر ستی
ژ گرنگترین و ب هێزترین یاریێن ئەڤرۆ ل دەمژمێر 11ی شەڤ دێ ل یاریگەها سانتیاگۆ بیرنابیۆی هێتە كرن دەمێ یانەیا ریال مەدرید یا ئسپانی خودانا 15 ناسناڤێن چامپیۆنزێ مێڤاندارییا هەڤڕكا خوە یا بەردەوام مانچستەر ستی كەت، د یارییا حەفتییا بۆری دا یانەیا ئسپانی شیابوو ب ڕیمۆنتادا سەركەفتنێ ل سەر مان ستی بینت ب 3-2 گۆلان، د پێنج خولەكێن دووماهیێ دا شیا پاشكەفتنا خوە ب2-1 گۆلان بكەتە 3-2 گۆلان كو دبیتە سەركەفتنا پێنجێ یا دیرۆكی بۆ ریالێ، د بەرانبەردا مان ستی چار سەركەفتن هەنە و چار وەكهەڤی هاتینە.
بۆرۆسیا دۆرتمۆند- لەشبۆنە
بڕیارە ئەڤ یارییە ل دەمژمێر 8:45 شەڤ ل یاریگەها سینگال ئیدنا د هێلینا بۆرۆسیا دۆرتمۆند یا ئەلمانی بهێتە كرن و مێڤاندارییا لەشبۆنە یا پۆرتۆگالی كەت، هەرچەندە یانەیا ئەلمانی پێنگاڤەكا باش بۆ قۆناغا 16 هاڤێژتیە پشتی د یارییا بۆری دا ب سێ گۆلان سەركەفتن ئینایی، دێ دناڤ ئەرد و جەماوەرێ خوە دا یاریێ كەت و بۆ سپۆرتینگ لەشبۆنا یا بزەحمەت بیت زێدەتر سێ گۆلان بكەت لێ د فوتبۆلێ دا هەموو پێشبینی دهێنە كرن.
پاریس سانجێرمان- برێست
دیدارا فرەنسی دناڤبەرا هەردو یانەیێن فرەنسی دایە ئەوا دێ ل دەمژمێر 11 شەڤ ل یاریگەها پارك دی برێست ل پاریسێ هێتە كرن، ل دووڤ زمانێ هژمارتنێ یانەیا پاریس سانجێرمان نێزكترە بۆ دەربازبوونێ ئەوا ل یارییا بۆری سێ گۆل ل سەر تۆماركرین، د ڤێ یاریێ دا برێست پێدڤی ب چار گۆلان بی بەرانبەر هەیە هەتا پلێتا قۆناغا 16 مسۆگەر بكەت.
یۆڤانتۆس- ئایندهۆڤن
د یارییا چارێ یا چارچووڤەیێ قۆناغا پاشگۆ دا یانەیا یۆڤانتۆس یا ئیتالی دێ ل یاریگەها خوە ئایندهۆڤن یا هۆلەندی مێڤان كەت، د یارییا بۆری دا یانەیا بیانكۆنێری ب2-1 سەركەفتن ل سەر یا هۆلەندی ئینابوو، لەوما ژی دەلیڤە بۆ هەردو یانەیان بەردەستە و یاری ب سانەهی نابیت.
سیستەمێ قارەمانیێ و چاوانییا یاریێن قۆناغا 16ێ
پشتی هەشت یانەیێن پاشكۆ دەرباز دبنە قۆناغا 16ێ چو پشككێشان ناهێتە كرن بەلكو دێ یاریێن خوە یێن ئێكێ قۆناغا چوونێ دناڤ ئەردێ خوە دا كەن و یاریێن دویێ دێ ژ دەرڤەیی یاریگەها وێ بن، ئەوا بڕیارە ل چار و پێنجێ ئادارا بهێت دەستپێبكەن، یاریێن دویێ یێن هاتنێ دێ پشتی حەفتیەكێ بن.
