دیدارا ڤەگێرانا كوردی(١) ل سێمێلێ هاتەكرن
ژ بزاڤێن رێڤەبەرییا گشتی یا رەوشەنبیری و هۆنەری ل پارێزگەها دهۆكێ، رێڤەبەرییا رەوشەنبیری و هونەری ل سێمێلێ، ب پشتەڤانی و بەرهەڤبوونا بەرێز د. عەلی تەتەر، پارێزگارێ دهۆكێ و بەرێز، ئەمیر عەلی، رێڤەبەرێ گشتی یێ رەوشەنبیری و هونەری و هەژمارەكا بەرچاڤ یا رەوشەنبیر و ئەكادیمی و نڤێسكاران، دیدارا ڤەگێرانا كوردی ئێك هاتە كرن و ل رۆژێن سێشەمب وچوارشەمبێ رێكەفتی 28-29/11/2023 بەردەوام بوو.
ئەڤ دیدارە ل سەر دوو رۆژان و چار پەنەلان هاتە دابەشكرن، ل رۆا ئێكێ و ل ژێر پەنەلێ دانێ سپێدێ رێروسمێن دیدارێ ب راوەستیانا چەند خۆلەكا وەك رێزگرتن بۆ گیانێ پاكێ شەهیدێن رێبازا ئاشتیخوازا كوردستانێ دەستپێكر. پاشی بەرێز ئەمیر عەلی، رێڤەبەرێ گشتیێ رەوشەنبیری و هونەرێ – دهۆك، گۆتارەك پێشكێشكر، تێدا باسێ گرنگیدانا وەزارەتا رەوەشنبیری وهونەری یا هەرێما كوردستانێ و ستراتیژیەتا وێ بۆ پێشڤەبرنا وگەشەكرنا رۆلێ رەوشەنبیر وهونەری و هەر وەسا باسی پلان و بزاڤێن رێڤەبەریا رەوشەنبیری وهونەری ل دهۆكێ كر. هەر وەسا چەندەكێ باسێ دیدارا ڤەگێرانا كر و چەند تیرۆژك دانان ل سەر ڤەگێرانا چاند و ئەدەبا كوردی و رۆلێ وێ پاراستنا كلتوور وزمانێ كوردی دا، وشیانیێن نڤیسەر وچیرۆكنڤیس و رۆمانڤیسێن كورد كو هەتا چ رادەی د ڤێ پرسێ دا سەركەفتی بووینە و ئارمانج بجه ئینانە، وتەكەز ل سەر گرنیگدان ب ئەدەبێ كوردی كر وەك كاكلا ئاڤاكرنا نڤش و بەرەبابێن جڤاكی ب رەنگەكێ راست و دورست، وگرنگیدان ب رۆمانێ وەك كچا باژێران بۆ ئاڤاكرنا مرۆڤان و پێشخستنا هش و هزرا شارستانی.
پاشی رێزدار د. عەلی تەتەر پارێزگارێ دهۆكێ، پەیڤەكا گرنگ و پر مفا پێشكێشكر و تێدا ب كورتی باسێ هەمی رەهەندێن ب ڤەگێرانێ ڤە گرێدای كر و تەكەز ل سەر ئالیێ گەش و رۆناهی ژ هزر و ئاراستەیێن د ڤەگێرانا كوردی دا كر و پشتەڤانیا پارێزگەهێ بۆ هەمی جۆرە بەرهەمێن دكەڤن ژێر خانەیا هزرێن رۆناك وب رهوریشالێن نەژاد و نەتەوا مللەتێ مەڤە ڤە گرێدای دەربڕی.
پاشی پێشانگەهەكا وێنەیێن هەژمارەكا نڤێسكار، هونەرمەند و بلیمەتێن كورد كو ژلایێ هونەرمەند، ماهر مستەفا و ب بەرهەمێن سرۆشتی هاتبوو بەرهەڤكرن و دگەل ئاوازێن گرۆپێ مۆزیكێ گەنجێن سێمێلێ هاتە نیشا دان.
هەژیە بێژن كو ئەڤ رێورسمە ژ ئالیێ رۆژنامەڤان ومیدیكارێ ژێهاتی حەسن فەتاح هاتە برێڤەبرن.
پەنەلێ ئێكێ برێڤەبرنا چیرۆكنڤیس ورێڤەبەرێ رەوشەنبیریا سێمێلێ بەرێز ئیسماعیل هاجانی برێڤەچوو وتێكدا ل دەستپێكێ پ. د. ئیبراهیم ئەحمەد سمۆ وەك كەسایەتیەكا پێشەنگ دبوارێ شانۆیا كوردی یا دەڤەرێ دا، سیمنارەك ل ژێر ناڤێ( كارتێكرنا كەلەپوورێ كوردی د شانۆێا كوردی دا) پێشكێشكر و تێدا چەند ئێستگەهێن گرنگ یێن شانۆیا كوردی و رەهەندێن ڤەگێرانا نیشا دا.
پاشی د. گۆران سەباح خوادنێن چەندین ئەزموونێن گرنگ ل وەلاتێ، بیانی و ب تایبەت ل ئەمریكا سمینارەك ل ژێر ناڤێ ( پراكتیزەكرنا ڤەگێرانێ د رۆمانا كوردی دا، میناك، رۆمانا مرۆڤێ هەرزان) پێشكێشكر.
هەر وەسا پاشی نڤیسەر و ڤەكۆلەرێ بەرنیاسێ بەرێز ئەنوەر محەمەد تاهر سیمینارەك بها ل ژێر ناڤێ ( سەربۆرا من یا نڤێسینێ) پێشكێشكر و چەند تەوەرێن گرنگ نیشادا.
لدانێ ئێڤاری پەنەلێ دووێ دەستپێكر و ل دەستپێكێ سمینارەك ژ ئالیێ چنور سعیدی ل ژێر ناڤێ(چیرۆك و ئەزموونە جیاوازەكان) هاتە پێكێشكرن وتێدا باسی ئەزموونێن جودا جودا یێن د چیرۆكان دا كر و چەند تیرۆژكێن بالكێش دانان ل سەر ڤی تەوەری.
پاشی بەرێز د. نەجم الونی مامۆستایێ زانكۆیا سەلاحدین سمینارەك ب ناڤێ ( رۆمانا زەنگدانەوە دناڤبەرا ژیاننامە و ژیانناما خوی دا) پێشكێشکر و تێدا تەوەرێن ژیاننامەیا كەیاسەتی و ژیانناما زاتی نیشادا و چەند تیرۆژكێن كارتێكرنا ژیاننامێ ل سەر ڤێ رۆمانێ نیشا دا. پاشی رێزدار عەبدولخالق یەعقووبی نڤیسەر و رەخنەگرێ ئەدەبی سمینارەك دەرباەری ( رەسەنایەتیا دەقی د ڤەگێرانێ دا) پێشكێشكر و باسی رەهەندێن رەسەنێن تێكستێ د ڤەگێرانێ دا كر. ل دوماهیێ ئەو بەرێزێن بەشدار ب خەلاتێ ڕێڤەبەریا رەوشەنبیری و هونەری/سێمێل، هاتنە خەلاتكرن.
ڕۆژا دووێ ل 29/11/2023 ژ دیدارا ڤەگێرانا كوردی(١)، ب دوو پەنەلان هاتە كرن، وبەرنامێ دیدارێ ل دانێ سپێدێ وپەنەلێ ئیكێ وێ رۆژێ نڤیسەر عبدالرحمن بامەرنی برێڤەبر. ل دەستپێكێ رۆمانڤیسێ و میدیكار سەبری سلێڤانەیی سمینارەك گرنگ و پرمفا ل ژێر ناڤێ ( فرەدەنگی د ڕۆمانێ دا) پێشكێشكر. پاشی د.زوزان صادق سعید سمینارەك دەرباەری ( تەكنیكا دەمێ ڤەگێرانێ د دەستپێكا ڕۆمانێ دا) پێشكێشكر. هەر وەسا پاشی د. نوزاد احمد اسود، لجهێ وی ماموستا (نامق هەورامی) بابەت هاتە خواندن لدۆر( گێرانەوە لە نێوان ڕۆمان و بیرەوەریدا).
لدانێ ئێڤاری پەنەلێ دووێ ب رێڤەبرنا م.هـ.راگرێ پەیمانگەها تەكنیكی-رەواندز لقێ زاخو :(ئومێد سەگڤان) برێڤەچوو. ل دەستپێكێ نڤیسەر عسمەت محمد بدل سیمنارەك ب ناڤێ (ڤەگێڕان تێگەهـ و وەرار) پێكێشكر و پاشی نڤیسەر ئیبراهیم خورت سمینارەك ل ژێر ناڤێ ( ڕەوشا ڕۆمانێ ل باكوور) پێشكێكر دویڤدا نڤیسەر كوڤان سندی ل سەر( سەربۆرا نڤێسینێ)ئاخفت وچەند تیرۆك دانان ل سەر سەربۆرا نڤیسنێ.
لدوماهیێ مێهڤانێن سمینار پێشكێشكرین ب خەلاتێ ڕێڤەبەریا رەوشەنبیری و هونەری/سێمێل هاتنە خەلات كرن.
