دیمۆكراتیا كوره..
هنده‌ك مرۆڤێن ده‌ركه‌تین جۆره‌كێ نوو یێ دیمۆكرایێ ل گه‌ل خوه هینایه هۆلێ, دیمۆكراتییا وان ژی ترسینۆكترین و نه‌شرینترین شێوه‌یه بۆ خه‌لكی نیشاده‌ن, ئه‌و ژی ده‌مێ د (فه‌یسبووكێدا) شاشی و كریارێن به‌رپرسێن مه به‌لاڤ دكه‌ن! ما ئه‌ڤه ژی ئازادییه یان دیمۆكراتییه دگۆتن و نه‌ڕازیبوونێ دا؟ ئه‌ڤه گه‌له‌ك سال ده‌ربازبوون و مه وه‌لات و حوكمه‌ته‌كا دیمۆكراتی هه‌ی! پا بۆچی گه‌له‌ك ژ ملله‌تی ب دزیڤه مافێ خوه یێ دیمۆكراتی بكاردهینین د نه‌رازیبوونێ دا؟ ئه‌ڤه چ جۆره ئازادیه ئه‌ڤ مرۆڤه به‌لاڤ دكه‌ن؟! هۆسا نه‌شرین و ب كه‌ربوكین, دهاڤێژنه به‌رپرس و رێڤه‌به‌رێن مه! ب ناڤه‌كێ له‌نگ و دز دقه‌بن و خه‌لكه‌كی ل خوه كۆم دكه‌ن وه‌رن سه‌حكه‌نێ فلان به‌رپرسی هنده پاره خوارن! ما ئه‌ڤه تشته‌كێ نوویه تو دبێژی؟! پا ئه‌ڤ كه‌نال و راگه‌هاندنا (ئوپۆزسیۆنێ) چاوا ل وه‌لاتێ مه په‌یدابوونه؟ ما نه ژ پێشكه‌فتنا دیمۆكراتیێ چێبوون؟! پانێ ته‌خسیر ناكه‌ن بۆ ئه‌زمانێ خوه, ما به‌ر دكه‌ڤیت ئه‌م ب دزیڤه دیمۆكراتیه‌تێ بدزین د وه‌لاته‌كێ دیموكرات دا؟ ئه‌رێ هوون به‌رپرس دزانن ئه‌ڤه كینه پیڤازا هنگۆ سۆر دكه‌ن د ئه‌نترنێت و فه‌یسبووكان دا؟ هه‌ما هه‌ر هه‌ڤالێن هه‌وه یێن روح و جانن ئه‌ڤێن هنگ ب سه‌رێ وان سووند دخۆن! ما هه‌كه دێ فه‌قیرێ خۆلیسه‌ر ژ كیڤه زانیت كۆ ته وێ شه‌ڤێ 100 ده‌فته‌ر ل قومارێ دان؟ یان تۆ چووبوویه (عیلاجێ كه‌یفێ) ل ده‌رڤه‌ی وه‌لاتی ؟ یان.. .
یا دیاره و یا ئاشكه‌رایه ل جیهانێ كو عیراق و گه‌له‌ك وه‌لاتێن ناڤه‌راستا ناڤین د پێشه‌نگن د لیستا (كوروپشۆنێ) دا. كوردستان ژی ل ده‌مه‌كێ درێژ د سیسته‌مێ ڤان وه‌لاتێن پیس دا ب ته‌په‌سه‌ری ژیان ده‌ربازكر, دێ هه‌ر هنده‌ك مرۆڤێن نه‌ساخ هه‌بن كو دڤه‌گرتی بن ژڤێ ئێشا پیس.
به‌لاڤكرنا نه‌رازیبوونێ ب ڤی شێوه‌ێ نه جوان و بێی به‌لگه‌نامه نابیته جهێ باوه‌پێكرنێ و نه‌جوانتریت ئازادییه د ده‌ركرنا گۆتنه‌كێ دا!
دبێژنه ڤێ چه‌ندێ بێ به‌ختی! ب ڤی شێوه‌ی ئالیێ نه‌راست ب هێزتر دكه‌ڤیت. مه رۆژنامێن ئازاد هه‌نه خه‌به‌رێ ته به‌لاڤبكه‌ن, مه كه‌نالێن ته‌له‌فزیۆنێ هه‌نه ده‌نگوباسێن به‌رپرسی ب تلیلیڤه وه‌شینیت.
ره‌شكرنا سه‌روچاڤێن كه‌سه‌كی بێی به‌لگه‌نامه كاره‌كێ نه‌ڕه‌وایه و دژایه‌تییه. ئه‌ڤا نوكه هنده‌ك مرۆڤێن ترسینووك دكه‌ن ل سه‌ر فه‌یسبوكێ تنێ بێ به‌ختیه‌كا كه‌سایه‌تیه, هه‌كه ڕاست ژی بیت بێ به‌لگه‌نامه نابیته جهێ باوه‌رپێكرنێ. بۆچی ئه‌ڤ جۆره مرۆڤه په‌یدابوون؟
ژ ئه‌گه‌را نه فێربوونا ملله‌تی بۆ ناڤه‌رۆكا هزرا ئازاد د ده‌ركرنا نه‌رازیبوونێ دا گه‌له‌ك ژ خه‌لكێ مه قه‌ستا ڕێكێن له‌نگ كرن بۆ ده‌ربرینا هزری. ما ژكیڤه مه ل خواندنگه‌هێ پرتووكه‌ك ل سه‌ر سیسته‌مێ دیمۆكراتی هه‌یه؟ كو زارۆ و گه‌نجان فێری ڕێیێن دورست بكه‌ن ده‌مێ نه‌رازی بن ژ به‌رپرسێن خوه یان ژ حوكمه‌تا خوه؟! (هندی ئه‌م دنه‌زان بین هند دێ دگوه درێژبین دژیانا خوه‌دا). (هندی سیسته‌مێ كاروبارێن مه ب دو كۆمه‌نت و كاغه‌ز نه‌بن, چ تشت نه جهێ باوه‌ریێ یه).
هه‌تا نوكه ملله‌ت نزانیت سیسته‌مێ وه‌لاتێ وی چییه؟ نه‌زانین كوره‌تی یه, بلا حوكمه‌تا مه خه‌لكی فێری زانینا هزرێ بكه‌ت ب ڕێیا خواندنگه‌هان و فێرگه‌هان و ده‌زگه‌هێن ڕاگه‌هاندنێ و ده‌ست ب ره‌وشه‌نبیریا خه‌لكی بكه‌ت دا بزانن كا دیمۆكراتیه‌ت چ تشته؟
