دێربیێ بادینان ب وەكهەڤییا 14ێ و توندوتیژییا جەماوەری ب دووماهی هات
هەردو یانەیێن دهۆك و زاخۆ هژمارەیا وەكهەڤیێن دێربییا پارێزگەهێ گەهاندنە یا 14ێ پشتی د یارییا شەڤا دەربازبوویی دا بێ گۆل وەكهەڤبووین ژ چارچووڤێ هەڤڕكیێن گەڕا سێیێ یا خولا ستێرێن ئیراقێ یا تەپا پێی ئەوا ب بەرهەڤبوونا زێدەتر 20 هزار ژ جەماوەرێن هەردو یانەیان ل یاریگەها سەرەكی یا یانەیا دهۆكێ هاتیە ئەنجامدان و دووماهییا وێ ب توندوتیژی ب دووماهی هاتی.
د نیڤا ئێكێ دا سەرباری ل دەستپێكا خولەكێن وێ تیما دهۆكێ ئاستەكێ باش نیشان دا و بزاڤ بۆ تۆماركرنا گۆلا پێشكەفتنێ د كرن لێ ئەو هەمی بزاڤە بێ ئەنجامبوون، د بەرانبەر دا یاریزانێن زاخۆ هندەك لڤینێن كێم هەبوو ئەوژی چو مەترسی دیار نەبوو، ب گشتی چو هێرشێن گۆلكرنێ و مەترسی یێن تۆماركرنا گۆلەكێ و ئەو ئاستێ پێدڤی ژی نە دهاتە دیتن ئەوا ئەڤ نیڤە بێ گۆل ب دووماهی هات.
د نیڤا دویێ دا هەردو تیمان بەردەوامی دا ئاستێ خوە یێ نە چاڤەڕێ كر كو جەماوەرێ هەردو تیمان بێزاركربوون، د خولەكا 54ێ دا هێرشبەرێ دهۆكێ زیاد ئەحمەد دەلیڤەكا گۆلكرنێ ژ دەستدا كو دبیتە مەترسیترین هێرشا تیما دهۆكێ ل سەر گۆلا زاخۆ، دووڤدا هندەك گوهۆڕین كەفتنە ل سەر ئاستێ یاریی تا رادەیەكی لڤین پەیدابوو دەرئەنجامێ وێ پیشەكارێ زاخۆ یێ بەرازیلی كۆستاڤۆ د خولەكا 57ێ دا هێرشەكا مەترسی ل سەر گۆلا دهۆكێ بر لێ ئەو ژی بێ ئەنجامبوو، ژ روویێ هونەری و ئاستی ڤە د ماوەیێ هەردو نیڤان دا چو ئاستێ جوان نە هاتە دیتن، سەرەرایی راهێنەرێن هەردو تیما چەند گوهۆڕین د ناڤ رێزێن تیمێن خوە دا دكرن پێخەمەت زێدەتر گڤاشتن و تۆماركرنا گۆلا پێشكەفتنێ لێ چو ژ ئەنجامی نە هاتە گوهۆڕین و یاری بێ گۆل ب دووماهی هات.
زیانێن مەزن ب یاریگەهێ و مولكێ گشتی كەفتن
د ماوەیێ نیڤا دویێ دا و دەمێ یاریێ بڕێڤە د چوو و د ناڤا كورسیێن یاریگەهێ دا توندوتیژی د ناڤبەرا جەماوەرێن زاخۆ و دهۆكێ پەیدابوو تا گەهشتیە وێ رادەیی كۆمەكا جەماوەرێ زاخۆ زیان گەهاندە یاریگەها دهۆكێ و زێدەتر 1000 كورسیك شكاندن و سۆتن، دیسان زیان ل دەوربەرێن یاریگەهێ و دەرڤەیی یاریگەهێ ل مولكێ گشتی و تایبەت كەفتن پشتی یاری ب دووماهی هاتی و چەند كەسەك برینداربوون ژ وانا دو كەس هاتنە ڤەگۆهاستن بۆ نەخۆشخانێ، هەرچەندە تا رادەیەكێ باش ژی پۆلیسێن یاریگەهێ نە هێلان ئەڤ توندوتیژیە مەزنتر لێبهێت.
داخویانیێن هەردو راهێنەران د كۆنگرەیێ رۆژنامەڤانی دا
پشتی ب دووماهی هاتنا یاریێ كۆنگرەیی رۆژنامەڤانی بۆ كادرێ راهێنانێ یێ هەردو تیمان ژلایێ رێكخەرێ فیدراسیۆنا تەپا پێی یا ئیراقێ بۆ كادرێ تیمێن هەردو یانەیان هاتە رێكخستن، ل دەستپێكێ تەلال ئەلبلۆشی راهێنەرێ تیما یانەیا زاخۆ گۆت: رازیمە ل سەر ئاستێ یاریزانێن خوە و وەكهەڤییا ڤێ یاریێ ڤەگەریانە بۆ ئاست و ئەنجامێن باشتر د یاریێن بهێت دا، ئەو روودانێن د ناڤ یاریگەهێ دا پەیدابووین من پووتە پێ نەدا بتنێ هزار من ل سەر تیما من بوو و من نە دهێلا كارتیكرنێ ل سەر ئاستێ یاریزانێن مە بكەت، ژلایێ خوە حەیدەر سەباح هاریكارێ راهێنەرێ دهۆكێ گۆت: ژبەر گڤاشتنێن ل سەر یاریزانێن مە دماوەیێ هەرسێ رۆژان یارییەك و نە پشكدارییا هێران ئازادی ئەوێ ل یارییا دگەل نەورۆز ب كارتا سۆر هاتییە دوورئێخستن كارتیكرنا خوە ل سەر تیمێ كربوو، هەرچەوابیت ژ ئاستێ یاریزانان رازینە، لێ مخابن ئەوا ل سەر پەلۆكێن یاریگەهێ دا چێبوویی یا جوان نەبوو.
بۆ زانین ل دووڤ ئامارێن یاریێن د ناڤبەرا هەردو تیماندا 21 جاران بەرانبەری ئێك بووینە، رێژەیا مەزن یا وەكهەڤییان بوویە كو 14 جاران، پێنچ سەركەفتن بۆ دهۆكێ و دو بۆ زاخۆ بووینە، دهۆكێ 19 گۆل تۆماركرینە ژلایێ خوە زاخۆ 13 گۆل بووینە.
