دێ هژمارهكا یاریزانان هێنه دوورخستن
ئهڤرۆ، زاخۆ، عهلی حاجی:
سهرۆكێ یانا زاخۆ یا وهرزشی دیاركر بڕیاره دێ هندهك گوهۆڕین د ناڤ رێزێن تیما وان یا تهپا پێی ئهوا پشكدار د خولا پلا نایابا ئیراقێ دا هێنه كرن ژوانا دوورخستنا هژمارهكا یاریزانان و زێدهكرنا هژمارهكا دی یا كوڕێن باژێرێ زاخۆ ئهو ژی ل دووڤ پلانا كادرێ راهێنانێ یه و سڤككرنا بارێ دارایی یا یانێ.
زێدهتر بلند شهفیق بۆ رۆژناما ئهڤرۆ گۆت: پێخهمهت باشترین بهرههڤی بۆ وهرزێ نوو یێ خولا پلا نایابا ئیراقێ مه گرێبهستا هژمارهكا باش یا یاریزانێن دهرڤهیی ههرێمێ ب رهكهز عهرهب ئیمزاكربوون و پشتی تاقیكرن و یهكێن راهێنانێ دهستپێكرین كادرێ راهێنانێ ل دووڤ پلا و بهرنامێ خوه ل سهر ئاستێ ههموو یاریزانان راوهستیاینه دیاربوو هژمارهكا یاریزانان چو مفایی ژ شیانێن وان ناهێنه وهرگرتن و دێ گوهۆڕین هێنه كرن و كێمكرنا وان بۆ نێزیكی 30 یاریزانان و پشتبهستن ل سهر حهفت یاریزانێن كوڕێن باژێرێ زاخۆ هێنه كرن و پێنگاڤا مه ژی ئهوه ئهم بشێن بارگرانیا دارایی ل سهر كارگێریێ كێم بكهین و ههروهسان مه رێكهفتن ل گهل كادرێ راهێنانێ ژی كریه كو هژمارهكا باش یا یاریزانێن كوڕد دناڤ تیمێ دابن پێخهمهت بشێن پاشهرۆژێ دا مفایی ژێ وهربگرن و ههتا نوكه حهفت یاریزان هاتینه زێدهكرن بهرۆڤاژی وهرزێ بۆری بتنێ دو بوون.
ژلایهكێ دووڤه ناڤهاتی دیاركر نوكه دا مژویلی دانۆستاندنێ نه ل گهل ئهوان یاریزانێن بۆ تیما مه یا خولا پلا نایاب كوردستانێ هاتینه دهستنیشانكرن پشتی ژلایێ كادرێ راهێنانێ بڕێیا تاقیكرنێن چهستهیی هاتینه ژێگرتن بۆ وهرزێ نوو زێدهباری تیما مه پێدڤی ب چو یاریزانێن دهرڤهیی باژێرێ زاخۆ نابن و ب یاریزانێن بهردهست دێ شێن ههڤڕكیێ د خولێ دا كهن.
