دێ وه‌ره
یاسین دێره‌شی
دڤێ ڕۆژه‌ڤێ دا
ئه‌ڤ باژێره چه‌ند پێتڤی ته‌یه
هنده‌ك عه‌شقێ بكه باران
دا گولێن سۆر بهێن ئاڤدان
دا به‌س ئه‌ڤیندار ب بن كۆچبه‌ر
ـــــــــــــــــــــــــ
دێ وه‌ره
ئه‌گه‌ر تو نه‌بی
ڤێ ژیانێ چ تام نینه
تو كلیلا ده‌رگه‌هێ به‌ختانی
وه‌ره به‌ختێ ڤی باژێری ڤه‌كه
چ زڤستانه‌كا هشكه
یا هشكه ژ باران و به‌فرێ
یا هشكه ژ ڕۆژێن خۆش
یا مشته ژ قه‌یران و
مرۆڤێن بێ هه‌ست و سۆز
ـــــــــــــــــــــــ
دێ وه‌ره
ئه‌ڤ باژێره
ژخۆشیا یێ خرش دبیت
گیانێن ئازار دایی
دباوه‌شا سینكێ خۆ دا هه‌مبێز بكه
ب ماچان برینا ده‌رمان بكه
كولانێن پڕ ژ تۆره‌بوونێ ئاش بكه
ـــــــــــــــــــــــ
دێ وه‌ره
خه‌ون و هیڤییا
ژ كۆچبه‌ریێ مخل بكه
چ به‌خت ڕه‌شی یه
نه‌ره‌ڤ و كۆچبه‌ری
نه باژێرێ ڕۆژه‌ڤێ
مه د هه‌مبێزا خۆ دا
ئارام دكه‌ن.
