دێ پرەكا رەوشەنبیری دناڤبەرا چیرۆكنڤیسێن كورد و یێن هولەندی دا دانیت
شاكر ئەتروشی:
هەلبەستڤان (رۆندك مزوری) د دیدارەكێ دا بۆ رۆژناما ئەڤرۆ دیاركركو هاتنا وێ یا ڤێجارێ بۆ باژێرێ وێ دهۆكێ ژبەر دو مەرەمان بوو، یا ئێكێ بۆ چاپكرنا پرتووكەكا هەلبەستان بوو، لێ بۆ سالا بهێت پاشخست، یا دویێ ژی ئەو دێ هژمارەكا چیرۆكێن چیرۆكنڤیسێن دەڤەرێ ل گەل خوە بەت دا ل وێرێ وەرگێریتە سەر زمانێ (هولەندی) هەروەسا دێ هندەك چیرۆكێن هولەندی ژی كەتە كوردی ژبۆ هندێ كو دانەنیاسینەك دناڤبیەرا چیرۆكنڤیسێن پارێزگەها دهۆكێ و یێن هولەندی دا چێبیت.
ناڤهاتی، كو ئەڤە پتری بیست سالانە ل وەلاتێ هولەندا دژیت، هێشتا گۆت: ژبەركو ئەز هەرسێ زمانێن (هولەندی و عەرەبی و فارسی) ب باشی دزانم، بەردەوام ئەز دچمە چالاكیێن رەوشەنبیری و ئەدەبی و هونەری ل پتریا وەلاتان و ب خواندنا هەلبەستان ب زمانێن كوردی و عەرەبی پشكداریێ تێدا دكەم، هەروەسا گەلەك جاران ل ئاهەنگ و بیرەوەریێن مە كوردان وەك پێشكێشكار كاردكەم، بۆ نموونە ئاهەنگا هونەرمەند (عەبدولقەهار زاخۆیی) ل سالا بۆری ل ئەلمانیا من ب رێڤەبر، هەروەسا ژبەركو ئەز دەرچۆیا پشكا دەروونی مە ل زانكۆیێ وەك چالاكڤان دبۆارێ كێشەیێن ژنان ژی دا كاردكەم و ژ هەموو هەلبەستێن خوە ئەز پتر حەزژ هەلبەستا (تۆ دلی) دكەم كو بەری هەیڤەكێ ل سەر رۆپەلێن ڤێ رۆژنامێ بەلاڤبوویە دكەم، چنكو ئەز تامەكا تایبەت ژێ دبینم.
