دێ چاوان زانی تو مودمنی ل سه‌ر سوشیالێ و چاره‌سه‌ری چیه؟
ئه‌ڤرۆ:
هنده‌ك كه‌س تووشی ئیدمانێ د بن ل سه‌ر تۆڕێن جڤاكی، به‌لێ وه‌كو بابه‌تێن دی چاره‌سه‌ری ل گه‌ل ناهێته كرن، دبیت زنجیره‌كا كارتێكرنێن ده‌روونی لێ ببیت و ل سه‌ر گه‌له‌ك كه‌سان. پارچه ڤیدیۆیێن كورت بۆ هوشیاركرنێ چاره‌سه‌ریا ڤی بابه‌تی ناكه‌ن. ژ به‌ر هندێ ژی زارۆك و هه‌تا كه‌سێن گه‌نج و سنێل و مه‌زن ژی گه‌له‌ك پێڤه هاتینه گرێدان و بۆ ده‌مێن مه‌زن د میننه ل سه‌ر سوشیالێ بێ كو ئاگه‌ه ژ خوه هه‌بیت.
ئه‌ڤ كارتێكرنه ل سه‌ر كه‌سه‌كی بۆ كه‌سه‌كێ دی د جودانه، هه‌موو ئه‌و كه‌سێن سوشیالێ بكاردئینن ژی تووشی كارڤه‌دانێن خراب نابن، هه‌ڤدژی ڤێ چه‌ندێ بكارئینانا سوشیال میدیایێ گه‌له‌ك مفایێن خوه ژی هه‌نه، یا گرنگ ل ڤێره ئه‌وه بزانی دێ چاوان مفای ژێ بینێ دا كو ب خرابی كارتێكرنێ ل سه‌ر نه‌كه‌ت ب تایبه‌ت ل سه‌ر ساخله‌میا مرۆڤی و ده‌روونێ وی و یا پێدڤی به‌رچاڤ وه‌ربگریت.
– ئه‌و چ ئاریشه نه یێن دبیت تووش ببنێ؟
ئه‌ڤ ئاریشێن دبیت مرۆڤ تووش ببیتێ ب راستی د ئاشكه‌رانه بۆ هه‌موویان وه‌كو:
- كێمیا فوكسێ: بكارئینانا تۆڕێن جڤاكی دبیت سه‌رنجا خه‌لكی ڤه‌كێشیت و فوكسا وان كێم ببیت ل سه‌ر كارێن دی.
- دودلی و گۆمان: هه‌ڤبه‌ركیا به‌رده‌وام ل گه‌ل كه‌سانێن دی ل سه‌ر تۆڕێن جڤاكی دبیت دودلی و گۆمانێ په‌یدا دكه‌ت، د سه‌ر ئاریشێن رێزگرتنا كه‌سی دا.
- خه‌موكی: تشتێ به‌ربه‌لاڤ هه‌ستكرنه ب ژ ده‌ستدانا په‌یوه‌ندیكرنێ ب هه‌ڤال و خێزانێ.
- ئاریشێن نڤستنێ: به‌رده‌وام ب كارئینانا تۆڕێن جڤاكی دبیته ئه‌گه‌ر كارتێكرنێ ل سه‌ر نڤستنێ بكه‌ت و خوهدان و وه‌ستیانێ ژی په‌یدا دكه‌ت، یا به‌ربه‌لاڤه كو پتریا كه‌سان به‌ری بنڤن ڤیدیۆیێن كورت یێن تیك توكی و تشتێ وه‌كو وان ب كاردئینن.
– دێ چاوان زانی تو یێ مودمنی؟
وه‌كو هه‌موو ره‌وشێن دی یێن ئیدمانێ، باشترین تشت دانه‌نیاسینا ئاریشێ یه.
هه‌كه ته بڤێت تو پێدڤی وێ چه‌ندێ ی كو دووڤچوونا تۆڕێن جڤاكی ب ره‌نگه‌كێ به‌رده‌وام بكه‌یی، خوه هه‌كه نوتیفیكه‌یشنێن نوو ژی وه‌ربگری، هه‌ست ب دو دلی و خه‌موكیێ دكه‌ی ده‌ما نه‌یێ گرێدایی ئه‌نترنێتێ بی، ئه‌ڤه ئێك ژ نیشانێن ئیدمانێ یه.
مرۆڤێ مودمن گرنگیدانێ ب چالاكیێن دی ژ ده‌ست دده‌ن، ده‌ست ژ وان كاران ژی به‌ردده‌ن یێن پێشتر ئه‌نجام ددان، هنده‌ك جاران ب زه‌حمه‌ت د نڤین ژی.
– دێ چ كه‌ین دا كو خوه چاره بكه‌ین؟
دا كونترۆلێ سه‌ر وێ ئیدمانێ بكه‌یی، دڤێت ل دووڤ خالێن هه‌ڤپشك یێن ئیدمانێ ل سه‌ر تشتێن دی دچی:
- سنوره‌كی بدانه: ده‌مه‌كێ ده‌ستنیشانكری بدانه بۆ بكارئینانا تۆڕێن جڤاكی و فۆكسا خوه بێخه سه‌ر چالاكیێن دژی یێن نه‌گرێدایی ئه‌نترنێتێ.
- نوتیفیكه‌یشنا رابگره: وه‌رگرتنا به‌رده‌وام یا نوتیفیكه‌یشنا رێگره ل هه‌مبه‌ر كێم بكارئینانا تۆڕێن جڤاكی و ب ڤی ره‌نگی تو نه‌شێی خوه ژ ئیدمانێ رزگار بكه‌یی.
- هنده‌ك ئه‌پلیكه‌یشنا نه‌هێله: هه‌موو تۆڕێن جڤاكی ل جیهانێ ل خوه كۆم نه‌كه، كێم كه، ئێك یان دو ب تنێ به‌سن، ئه‌ڤێ ئیدمانێ ژی ب ره‌نگه‌كێ رێژه‌یی نه‌هێله.
- ل پێگوهۆڕێن ساخله‌م ب گه‌رێ: گه‌له‌ك تشت یێ ژ ده‌رڤه‌یی تۆڕێن جڤاكی هه‌ین دبیت هه‌مان خۆشی هه‌بیت، وه‌كو ئه‌نجامدانا وه‌رزشێ یا خواندن یان بوراندنا ده‌می ل گه‌ل هه‌ڤال و خێزانێ.
- داخوازا هاریكاریێ بكه: هه‌كه ته هه‌ست كر كو ئیدمانا ته ل سه‌ر تۆڕێن جڤاكی كارتێكرنێ ل سه‌ر ژیانا ته دكه‌ت ب ره‌نگه‌كێ زۆر، هزر د داخوازیا هاریكاریا كه‌سانێن شاره‌زا دا بكه.
