دێ چاوان ل سه‌ر خه‌مۆكییێ زالبی؟
ئه‌ڤرۆ ، زنار تۆڤی:
هه‌كه ته بڤێت چاره‌سه‌رییا كه‌سه‌كی بكه‌یی، یێ كو تووشی خه‌مۆكییێ بوویی، هژماره‌كا گاڤان هه‌نه، بۆ چاره‌سه‌رییا وی بابه‌تی، به‌لێ ب مه‌رجه‌كی، دڤێت شه‌ش هه‌یڤ ب سه‌ر وێ خه‌مۆكییێ ڤه ده‌رباز نه‌بن، داكو ئه‌و كه‌سه ب ره‌نگه‌كێ دروست بهێته چاره‌سه‌ر كرن.
نه‌جمه‌دین زێباری، ڤه‌كۆله‌ره‌كێ ده‌روونییه، د دیداره‌كێ دا بۆ رۆژناما ئه‌ڤرۆ دبێژیت: ده‌مێ كه‌سه‌ك تووشی خه‌مۆكییێ دبیت، دڤیت جهێ وی بهێته گوهۆرین، یێ كو تێدا تووشی خه‌مۆكییێ بوویی، داكو ئه‌و دیمه‌ن و روودان هه‌رده‌م ل پێش چاڤێن وی نه‌بن و ئێدی هزرێن ره‌شبین نه‌كه‌ت، هه‌روه‌سا ئه‌و كه‌ره‌ستێن دبنه ئه‌گه‌رێ تووشبوونا وی ب خه‌مۆكییێ، دڤێت ئه‌و ژی بهێنه گوهۆرین و ژێ بهێنه دووركرن، بۆ نموونه دیتنا هنده‌ك فلمان، هنده‌ك جۆرێن جلكان، شێوازێ ژیانێ، هنده‌ك جۆرێن خوارنێ، هه‌روه‌سا ئه‌و تشتێن ئه‌و حه‌ز ژێ دكه‌ت، دڤێت مرۆڤ دانیته جهێن وان تشتێن ئه‌و حه‌ز ژێ نه‌كه‌ت و پێ نه‌خۆش دبیت، ژ پێخه‌مه‌ت هزر و ئه‌و تشتێن نه‌خۆشییێ دگه‌هیننه وی، ئێدی نه‌میننه د ژیانا وی دا و ب ڤێ چه‌ندێ ئه‌و دێ ئارام بیت.
ناڤهاتی گۆت ژی: دڤێت ئه‌و مرۆڤێن بووینه ئه‌گه‌رێ خه‌مۆكییێ بۆ وی، ژ ژیانا وی بهێنه دوورخستن، پێدڤییه هه‌رده‌م ل گه‌ل مرۆڤێن گه‌شبین دا بیت و هه‌رده‌م به‌حسێ سه‌ركه‌فتنان و هیڤی یێن ژیانێ بۆ بكه‌ن، هه‌روه‌سا نابیت ئه‌و كه‌سه چو جاران ب میننه ب تنێ و باشتره هه‌رده‌م وه‌رزشێ بكه‌ن، چونكی وه‌رزش باشترین چاره‌سه‌رییه بۆ نه‌خۆشییێن ده‌روونی و مه‌ژیێ وان و له‌شێ وان چالاك دبیت و فشارێن ده‌روونی ل سه‌ر ژیانا وان كێم دبن.
نه‌جمه‌دین زێباری ئه‌و چه‌ند ژی دیار كر: گه‌له‌ك باشه مرۆڤ به‌حسێ هنده‌ك ئاریشان بۆ وان بكه‌ت، یێن كو به‌ری هنگێ هاتینه چاره‌سه‌ر كرن، تێدا بۆ وان دیار بكه‌ت، كو ئه‌و ئاریشه گه‌له‌ك ب زه‌حمه‌تتربوون ژ ئاریشێن وان و هه‌موو ژی یێن هاتینه چاره‌سه‌ر كرن، ب ڤی ره‌نگی دێ هیڤییه‌ك لده‌ف وان ژی په‌یدا بیت و دێ پتر هه‌ست ب ئارامییێ كه‌ن، دیسا ب شه‌ڤێ ژی، هه‌كه زوو خه‌وا وان نه‌هێت بلا نه‌چنه سه‌ر جهێ خۆ، باشتره به‌رده‌وام خۆ ب كاره‌كی ڤه مژوول بكه‌ن، هه‌تا خه‌وا وان دهێت، داكو تووشی خه‌مۆكییێ نه‌بنه‌ڤه.
