دێ بزاڤێ كەین گەنجێن دەرچووی و بێكار مۆچەیەكی بۆ دابین بكەین
سندس سالح سلێڤانەیی:
پ. د. ئیبراهیم عەلی كرۆ كۆچەر بەربژارێ ژمارە (6) دیار كر، دێ كاری ل سەر وی بەرنامەی كەین یێ كو ژلایێ (پارتی دیمۆكراتی كوردستان) ڤە هاتیە دارشتن و دێ ب هەموو شیانێن خوەڤە كاری بۆ سەرئێخستنا وی بەرنامەی كەین، هەروەسا ئەم دێ كاركەین بۆ بجهئینانا مادەیێن دەستۆری یێن هەلاویستی دناڤبەرا حۆكمەتا هەرێما كوردستانێ و حۆكمەتا ئیراقا فیدرال دا.
پ. د (ئیبراهیم عەلی كرۆ كۆچەر) بەربژارێ ژمارە (6) ل سەر لیستا (275) یا پارتی دیمۆكراتی كوردستان بۆ هەلبژارتنا جڤاتا نوونەرێن عیراقێ د دیدارەكێ دا بۆ رۆژنامەیا ئەڤرۆ گۆت: من باوەریا هەی و هەكە ئیرادە هەبیت ژ هەردو لایان ڤە، ئانكو حۆكمەتا هەرێمێ و حۆكمەتا فیدرال ڤە دێ شێین هەموو ئاریشەیێن هەلاویستی دناڤبەرا هەردو حۆكمەتان دا ل دووڤ دەستۆری چارەسەركەین، چونكو د زانستێن سیاسی دا هەیە چو تشت د رۆژەڤێ دا مەحال نین، هەروەسا سستەمێ پەرلەمانی ژی شاشیان قەبوول ناكەت.
پ. د (ئیبراهیم عەلی كرۆ كۆچەر) بەربژارێ ژمارە (6) ل سەر لیستا (275) یا پارتی دیمۆكراتی كوردستان، د لایەكێ دی دا گۆت: بۆچی پارتی ئەز هەلبژارتم بۆ پەرلەمانی؟ هەلبەت ژبەر وێ چەندێ بوویە، یا ئێكێ ل دووڤ پلا من یا زانستی و یا دووێ ژی ل دووڤ شیانێن من كو باوەریا ب وێ چەندێ هەی هەكە بچمە پەرلەمانی دێ ب دلسۆزانە كاركەم، هەروەسا ئەم هەموو پێكڤە دێ شەڕی بۆ بدەستڤەئینانا مافێن رەوایێن مللەتێ كورد كەین، ب تایبەت ئەوێن د دەستۆری دا هاتینە بنەجهكرن، هەروەسا پەیاما من بۆ هەموو نوونەرێن كورد ئەوێن دێ چنە بەغدا هەموو ئێك رێز و ئێك هەلویست و ئێك دەنگبن و هەكە ئەڤە هاتە كرن دێ شێین هەموو مافێن كوردان ب ساناهی بدەستڤە ئینین.
ل دووماهیێ پ. د (ئیبراهیم عەلی كرۆ كۆچەر) گۆت: درۆشمێ پارتی دانای بۆ ڤان هەلبژارتنان (هەڤپشكی، هەڤسەنگی، لهەڤكرن) گەلەك باش و سەركەفتی یە، لەورا فەرە ئەم هەموو كاری بۆ بجهئینانا وی درۆشمی بكەین، سەبارەت چارەسەركرنا كێشەیا مووچەیێن فەرمانبەرێن هەرێما كوردستانێ ژی، ئەڤە گرێدای ئیرادەیەكا سیاسی نە دناڤبەرا هەردو حۆكمەتان دا و هەكە ئیرادە هەبیت دێ چارەسەر بیت، سەبارەت بەرنامەیێ مە بۆ گەنجان و ئافرەتان ژی، ب راستی هندی گەنجن بنیاتێ ئاڤاكرنا هەر وەلاتەكی نە و ئافرەت ژی نیڤا جڤاكی نە، هەروەسا دێ بزاڤێ كەین گەنجێن مە یێن دەرچۆی و نەهاتینە دامەزراندن هەر چو نەبیت مۆچەیەكی بۆ دابین بكەین، كو دبێژنێ (هاریكاریا دابینكرنا جڤاكی) و ئەڤە ل عیراقێ و گەلەك وەلاتێن دی هەیە دێ بزاڤێ كەین گەنجێن مە ژی ژ وێ هاریكاریێ د بێ بەهر نەبن. زێدەباری چەندین كار و خزمەتێن دی بۆ هەموو تەخ و چینێن جڤاكی.
