دێ كلیپه‌كا نوو به‌لاڤ كه‌ت
ئه‌ڤرۆ نیوز ، زنار تۆڤى:
سترانبێژ عسمه‌ت ئاواز، كو خه‌لكێ جزیرا بۆتانه ل باكورێ كوردستانێ و ئه‌ڤه چه‌ندین ساله مالباتا وى ل باژێرێ باتمانێ دژیت، بۆ ئه‌ڤرۆ نیوز دیار كر: ل سالا 1993 وى ده‌ست ب كارێ هونه‌رى و سترانگۆتنێ كریه، لێ هه‌ر زوو ده‌وله‌تا تورك سانسۆر ئێخستیه سه‌ر كارێ وى یێ هونه‌رى و چه‌ندین جاران هاتیه گرتن و زیندان كرن، له‌وما ئه‌و نه‌چار دبیت باتمانێ بجه دهلێیت و دچیته باژێرێ ئیسته‌نبۆلێ و نوكه ژى ل وى باژێرى دژیت.
ناڤهاتى گۆت ژى: ئه‌و ل به‌ر ده‌نگێ ستران و موزیكا هورنه‌مه‌ندێن كورد شڤان په‌روه‌رى و محه‌مه‌د شێخۆى و ئارامێ تیگران مه‌زن بوویه و هه‌رده‌م گوهداریا سترانێن وان دكه‌ت، هه‌روه‌سا هه‌تا نوكه وى هه‌شت كلیپ و سێ ئه‌لبۆمێن سترانان ب ناڤێ ” دۆنیا مرنه ، دۆزا دلێ من ئامارا، گۆڤه‌ند و دیلان” چێكرینه و به‌لاڤ كرینه، نوكه ژى ئه‌و مژوولى چێكرنا كلیپه‌كا نوو یه ب ناڤێ ” بۆك و زاڤا” ، پشتى نه‌ورۆزێ دێ وێ كلیپێ ژى به‌لاڤ كه‌ت.
عسمه‌ت هێشتا دبێژیت: گه‌له‌ك سانسۆر ژ ئالیێ ده‌وله‌تا تورك ڤه ل سه‌ر هونه‌رێ كوردى ل باكور هه‌یه و دیسان هێشتا نوكه ژى باندۆرا موزیكا توركى ل سه‌ر یا كوردى هه‌یه، هه‌ر چه‌نده هونه‌رمه‌ندێن تورك پرانیا موزیك و سترانێن كوردى دزینه و كرینه مولكێ خوه، لێ سه‌ره‌راى ڤێ چه‌ندێ ژى ئه‌م شیاینه به‌رده‌وامیێ بده‌ینه هونه‌رێ خوه و ئێدى گرتن و زیندان كرن ژى نه‌شێت هونه‌رێ مه راوه‌ستینیت و هندى د ژیانێ دا بم، دێ خزمه‌تا هونه‌رێ كوردى كه‌ین، چونكى ئه‌م ڤێ چه‌ندێ وه‌كو ئه‌ركێ ل سه‌ر ملێ خوه دزانین.
