دێ هەموو پرسێن تورکیا ل پەرلەمانی چارەسەر کەین
نومان کورتولمیش سەرۆکێ پەرلەمانێ تورکیا راگەهاند، نها ل تورکیا قۆناغەکا نوو دەستپێکریە و بێگومان ئەو یەک گەلەک گرنگە، هەموو وەلاتیێن تورکیا دخوازن ئێدی شەڕ نەمینیت، مە هەموویان دڤێت توندوتیژی ل تورکیا ب دووماهی بهێت، ژ بۆ ڤێ یەکێ ژی بێگومان گرنگە ئەم هەموو پێکڤە کار بکەین.
سەرۆکێ پەرلەمانێ تورکیا سەبارەت ب چارەسەرکرنا پرسا کوردی ژی دیار کر، دڤێت پرسا کوردی و هەموو پرسێن دی ل پەرلەمانی بهێنە چارەسەرکرن، مە دڤێت هەموو پارتێن سیاسی یێن تورکیا ئێدی پرۆژەیێن خوە یێن چارەسەریێ بیننە پەرلەمانی، نها دەلیڤەیەکا گرنگ و دیرۆکی بۆ چارەسەریێ هاتیە پێش.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ب شەڕی چو پرسەک ناهێتە چارەسەرکرن، نها تێگەهشتنەکا گەلەک باش ژ بۆ چارەسەریا پرسا کوردی و هەموو پرسێن دی یێن تورکیا هەیە، گرنگە هەموو هێزێن سیاسی یێن تورکیا ناکۆکیێن هەی بدەنە رەخەکێ و ژ بۆ پاشەرۆژا تورکیا پێکڤە کار بکەن.
