دێ پاشەروژا خوە ل گەل ریال ئێکلا کەت
ئەڤرۆ نیوز:
یاریزانێ ھێلا ناڤین یێ یانا ریال مەدرید خویاکر ل ھەیڤا بھێت ئەو دێ ل گەل کارگێریا یانێ و خێزانا خوە کومبیت و پاشەروژا خوە ل گەل یانێ بو مان یان ڤەگوھاستنێ ئێکلاکەت.
مارکوس یورینتی یێ 23 سالی ب ئێک ژ دەرچویێن ئەکادیمیا یانا ریال دھێتە ھژمارتن، لێ بەروەخت بو ناڤا رێزێن ئالاڤیس ل ھاڤینا 2016 ھاتبوو ڤەگوھاستن بو ماوێ سالەکێ و پشتی پێشکەفتنا ئاستێ وی ڤەگەریا ریال، لێ ئەڤ یاریزانە یێ نیگەرانە ل ناڤا یانا ریال ب ئەگەرا کێم پشکداریێ و تنێ پشکداری یاریێن کاسا شاھێ ئسپانیا بیت و دویڤدا و پشتی ھنکافتنا یاریزانێ بەرازیلی کاسیمیرو راھێنەرێ یانێ یێ ئەرژەنتینی سانتیاگو سولار ئەڤ یاریزانە وەکو یێ سەرەکی پشکدارکر ل یاریا ھەمبەر روما یا ئیتالی د قارەمانیا یانێن ئوروپا دا و شیا ئاستەکێ باش نیشان بدەت.
ڤی یاریزانی ئەو چەندە ئاشکرا کریە ل ھەیڤا بھێت دێ ل گەل کارگێریا یانێ و خێزانا خوە ئاخڤیت ل دور پاشەروژا خوە ل یانێ و ئەو حەز دکەت یێ بەردەوامبیت ل یانا ریال و یێ سەرکەفتی بیت.
