دێ چاكسازی ب شه‌ڤ هێنه كرن یان ب رۆژ
هزار شوكر و حه‌مد بۆ خودایێ مه‌زن كو پشتی 24 سالێن حوكمرانیێ، حكوومه‌تا هه‌رێما باشوورێ كوردستانێ بیر ل په‌یڤا چاكسازیان كر، و بریار دا ل سالا 25 ژ حوكمرانیا خوه پرۆژه‌كێ چاكسازیان بجهبینیت ئانكو ل سالا 2016. ئه‌ڤه خه‌ون و حه‌زا هه‌ر تاكه كه‌سێ كورده (هه‌لبه‌ت یێن هه‌ژار و بێ ده‌ستهه‌لات) كو ڤێ چه‌ندێ ببینیت و ئه‌ڤ پرۆژه بجه بهێت و چاكسازی جهێ خوه بگرن و گه‌نده‌ل و گه‌نده‌لچی د ناڤ ده‌ستهه‌لاتێ و جڤاكی دا نه‌مینن. به‌لێ هه‌ر ل ده‌ستپێكا راگه‌هاندنا پرۆژه‌ی به‌رێزه‌كێ په‌رله‌مانتار بۆ رۆژناما ئه‌ڤرۆ ئاخفت و هێشتا ده‌ست ب چاكسازیان نه‌كری ئه‌م بێ هیڤی كرین و گۆت: “گه‌نده‌لی دێ هه‌ر مینیت”، ئانكو ئه‌ز وه‌سا تێدگه‌هم كو ئه‌و پرۆژێ وان به‌رهه‌ڤكری چ به‌حسێ گه‌نده‌لیێ تێدا نینه، چنكو هه‌كه گه‌نده‌لان چاكساز بكه‌ن دڤێت ب ئێك جاری حكومه‌ت و ئه‌و كه‌سێن د ناڤ حكومه‌تێ دا كار دكه‌ن بهێنه گوهۆڕین، چنكو ل دووڤ تێگه‌هشتنا من كێم كه‌سان د ڤێ حكومه‌تێ دا گه‌نده‌لی نه‌كرینه. دڤێت ئه‌م وه‌كو جڤاكێ كوردستانێ (حوكمه‌ت و جه‌ماوه‌ر) بزانینن كو گه‌نده‌لیه ئه‌گه‌رێ هه‌موو پاشكه‌فتنێن مه، بۆ نموونه هه‌كه گه‌نده‌لی نه‌با و د ڤان 24 سالێن بۆری دا هه‌ر ساله‌كێ مه ئێك سه‌عه‌تا كاره‌بێ چێكربا نوكه دا مه 24 سه‌عه‌تان كاره‌ب هه‌بیت و گه‌له‌ك نموونێن دی ژی یێن هه‌ین و من نه‌ڤێت گه‌له‌ك د ناڤ دا بچم. هه‌موو ده‌مان سیاسه‌تمه‌دار و ده‌ستهه‌لاتدار ڤێ گۆتنێ دده‌نه به‌ر سینگێ خوه و دبێژن (گه‌نده‌لی ب رۆژه‌كێ و دوویان چاره نابیت)، ئه‌ز دبێژم راسته چنكو ئه‌وێن بریارا چاكسازیێن دده‌ن بخوه ژ گه‌نده‌لیێ د بی به‌هر نینن، یان ژی هه‌كه ئه‌م بێژین راسته ب رۆژه‌كێ و دوویان گه‌نده‌لی چاره نابیت، پا ئه‌ڤه هنده سال و زه‌مانه بۆچی ده‌ست ب چاكسازیان نه دهاته كرن دا نوكه ب تنێ دو رۆژ مینن بۆ بنبڕكرنا ڤێ دیاردا كوژه‌ك. له‌ورا پێدڤیه ب رژدی كار ل سه‌ر ڤی پرۆژه‌ی بهێته كرن و بزاڤێن جدی بۆ نه‌هێلان یان كێمكرنا ڤێ دیاردێ بهێنه كرن، و هه‌كه مه بڤێت ڤێ دیاردێ نه‌هێلین پێدڤیه وه‌كو ده‌ره‌جكێن مالێ ژ سه‌ری ده‌ستپێبكه‌ین و پاقژ بكه‌ین، یان هه‌كه دێ ژ ده‌ره‌جكا بنی ده‌ستپێكه‌ن بلا تێكڤه‌نه‌ده‌ن باشتره چنكو پاقژ نابیت. یان ژی هه‌كه پرۆژێ حوكمه‌تێ بۆ چاكسازیان ب تنێ بڕینا هنده‌ك مووچه و بوَدجێن تایبه‌ت بیت دا چه‌ند ملیار دیناران بۆ گه‌نجینێ بزڤرینن، ئه‌ڤه چ خزمه‌تا وه‌لاتی ناكه‌ت و ب تنێ وه‌كو هه‌ر جار دێ بیته بریاره‌ك د به‌رژه‌وه‌ندا هنده‌ك كه‌سان دا و نه زێده‌تر. یان ب تنێ دێ بۆ وێ چه‌ندێ بیت هه‌ر لایه‌نه‌ك یێ دی رازی بكه‌ت دیسان ئه‌و بخوه ژی دێ بیته گه‌نده‌لیه‌كا دی یا موَدێرن و هه‌ر چ خزمه‌تا گشتی تێدا نابیت. هه‌كه راسته لایه‌نێن شوله‌ژێ د رژدن ل سه‌ر پرۆژێ چاكسازیان پێدڤیه بۆ خه‌لكێ كوردستانێ دیار بكه‌ن كا ناڤه‌رۆكا پرۆژه‌ی چیه و چاكسازی دێ كیرێ و كێ ڤه‌گرن؟ وه‌كو من گۆتی هه‌كه دێ ژ بنێ ده‌ره‌جكێ ده‌ستپێكه‌ن ئه‌ز دبێژم بلا نه‌هێته كرن باشتره یان ژی پێدڤیه ژ سه‌ری ده‌ستپێكه‌ن، چنكو هندی كانیا ئاڤێ یا شێلی بیت جۆك زه‌لال نابیت. ل دووماهیێ ب تنێ ئێك داخوازی ژ لایه‌نێن دێ چاكسازیان ئه‌نجام ده‌ن، دێ كه‌م؛ ئه‌و ژی پێدڤیه ئه‌و پرۆژێ خوه ب رۆژ ئه‌نجام بده‌ن چنكو ب شه‌ڤێ دێ تووشی ئاسته‌نگان بن ژ به‌ر نه‌بوونا كاره‌بێ.
