دێ چێبیت؟!
ملله‌ته‌كێ پڕ هیڤی، هه‌تا د نه‌خۆشترین بارودۆخ دا.. د كاودانێن ره‌ش دا، كو ب سه‌رێ ملله‌تێ كورد دا هاتین، هه‌ر هیڤیا خوه ژ ده‌ست نه‌دان و هه‌ر په‌یڤا (دێ چێبیت) ل سه‌ر زمانێ ئه‌ڤی ملله‌تێ سته‌ملێكری و سته‌م ل خوه كری بوویه. رۆژێن سه‌خت و دژوار، جینۆساید و كۆچ و برسێ ژی نه‌شیا ئه‌ڤی ملله‌تی بێ هیڤی بكه‌ت، هه‌ر وه‌سا هه‌ر رۆژه‌كا گه‌ش ل پێش چاڤێن مه بوویه. لێ ده‌ما دگۆتن: دێ چێبیت!! یا دیار بوو كو مه‌ره‌ما وان به‌حسا چ بوویه. لێ نوكه هه‌كه دبێژن: دێ چێبیت، مه‌ره‌ما وان كیژ چێبوونه‌ڤ؟! قه‌یرانا دارایی، یان ناكۆكیێن لایه‌نێن سیاسی، یان قه‌یرانا سه‌رۆكاتیێ و په‌رله‌مانی، یان ژی وه‌زاره‌تێن بێ وه‌زیر و مووچه، یان به‌حسا شه‌ڕێ تیرۆریستان، یان ژی دێ ئاستێ په‌یوه‌ندیێن ده‌رڤه‌ی وه‌لاتی دێ چێبیت یان ژی ده‌وله‌تا كوردی. ڤێجا ژ به‌ر هندێ باشتره بێژین: “چێ نابیت”. چونكو ئه‌ڤ بابه‌تێن نوكه مه گۆتین دێ چێبیت، چێبووی بوون ڤان خراب كرن. مه چاڤ ل موساته‌حه و گه‌نده‌لی و فرۆتنا گازێ نقاند مه هزر دكر دێ هه‌ر رۆژه‌ك هێت تێر بن، لێ تێر ژی نه‌بوون ئه‌ڤا چێبووی ژی خرابكر. راستیا وێ هه‌می حه‌ز دكه‌ن چێببیت و هه‌می به‌حسا چێبوونێ دكه‌ن، لێ یا دیاره كه‌سێ نیازا چێكرنێ نینه، چونكو هه‌می خوه ب مێهڤان دزانن ل ڤی وه‌لاتی و ئه‌ڤ وه‌لاته كریه بنگه‌هه‌كێ بازرگانی ژ بۆ بده‌ستڤه‌ئینانا سه‌رمایێ نه شه‌رعی و سپیكرنا سه‌رمایێ ملله‌تی و مه‌زاختنا وێ ل وه‌لاتێن چێبووی. هه‌كه ل سه‌ر ڤێ رێیا بێ پلان و بێ به‌رپرسانه به‌رده‌وام بین، یا باش ئه‌وه بێژین دێ خراب بیت. هیڤیبوونا مه تنێ بلا بۆ ئێكگرتنا مه بیت. هندی سیاسه‌ت ل سه‌ر حسابا ئاسایشا نه‌ته‌وه‌ی بێته كرن ژ بۆ مه‌ره‌مێن خراب و شكاندنا ئێكرێزی و دوبه‌ره‌كیێ د ناڤ خه‌لكێ كوردستانێ دا، كا چاوا دیرۆكێ دلۆڤانی ب مه نه‌بریه كو نه‌حه‌ز و دوژمنێن كوردان ئه‌م كربووینه ئه‌كته‌رێن هه‌ڕفاندنا خه‌ونا سیه ملیۆن كه‌سان، ئه‌ڤرۆ ژی بلا ڤێ سیناریۆیا ده‌ره‌كی پارچه پارچه بكه‌ین و جهێ كو ببینه ئه‌كته‌ر د فلمێن بیانیدا، فلمه‌كێ كوردی ب سیناریۆیه‌كا كوردی و باشترین ده‌رهێنه‌ر بكه‌ینه ده‌رهێنه‌رێ پاشه‌رۆژا خوه كو ده‌ربرینێ ژ ئێگرتنا ئه‌ڤی ملله‌تی بكه‌ت و پاشه‌رۆژا مه دیار بكه‌ت.
