دێ چ بیت ئه‌گه‌ر به‌غدا بكه‌ڤیت؟!
گه‌لۆ به‌غدا دێ كه‌ڤیت؟ كینه ئه‌وێن بزاڤ و پێكولان ژ بوََ گرتنا به‌غدایێ دكه‌ن؟ داعشن ئانكو بانگخوازێن هه‌رێما سونه‌ستانێنه؟ مه‌ره‌م ژ كه‌تاندنا به‌غدا چیه؟ واشنتوَن و هه‌ڤپیه‌یمانێن خوه ب ڕاستی دخوازن به‌غدا بكه‌ڤیت؟ ئانكو وه‌كی گڤاشتن و كارته‌ك سیاسی ل سه‌ر ده‌ستهه‌لاتا شیعه‌ستانان بكاردئینن؟ گه‌لوَ جاره‌ك دن دوباره‌بوونا كوَمیدیا شه‌ڕێ مووسلێ ل ئه‌نبارێ د سه‌رده‌مێ هه‌ردو كابینه‌ێن (مالكی و عه‌بادی) دا و هه‌ڕفینا له‌شكرێ به‌غدا و ڕه‌ڤینا وان و هێلانا چه‌ك و ته‌قه‌منیێ ب ڤی ڕێژه‌ی بوَ چه‌كدارێن داعش, چ ڕامانه‌ك سیاسی ناگه‌هینیت؟ ئه‌رێ ئه‌و چ كه‌س و لایه‌نن ل پشت په‌رده‌ی ئه‌ڤان جۆرێن له‌یستوَك و یاریێن سیاسی ئه‌نجام ده‌ن؟ ئه‌ڤه و كوَمه‌ك پرسیار و ڕامان و هزرێن دن خوه د سه‌رێ مه‌دا دچه‌مینن و هنه‌ك به‌رسڤ ژی جارێ نه‌د خوه‌یانه!! لێ به‌لێ یا گرنگه ئه‌م به‌رسڤێن ئه‌ڤان هه‌می پرس و پرسگرێكان د ناڤ پیاده‌كرنا سیاسه‌تا ڕوَژانه‌یا ئه‌مریكا و هه‌ڤپه‌یمانێن وێ ل ڕوَژهه‌ڵاتا ناڤین و ده‌وروبه‌رێن خوه بده‌ست ڤه بینین, نه‌خاسمه ئه‌و ڕوودان و چالاكیێن كو د ده‌روازه و ده‌رازینكێن كوَنگرێسا ئه‌مریكی و ئێكه‌تیا ئه‌وڕوپا و هه‌ڤدیتنێن باڵاێن ئابووری و كوَنگره‌ێن ووزه‌یا جیهانیدا دهێنه ئه‌نجامدان. ل ڤێره یا فه‌ره مروَڤ دووڤچوونه‌كێ ل سه‌ر هزرو بۆچوونێن ڕوَژئاڤا و ئه‌مریكا بكه‌ت سه‌باره‌ت ب ئه‌قلیه‌تا وان ده‌رباره‌ی ئاینده و پاشه‌ڕوَژ و چاره‌نڤیسا عیراق و ده‌ڤه‌رێ, داكو ب شێوه‌كێ ریالیست د ئه‌ڤان شه‌ڕوشوَڕو و كێشه‌و ململانێ و هه‌ڤدو ڕه‌تكرنێ بگه‌هیت. ئیروَ یاگه‌هشتیه وی ڕاده‌ی كو ساده‌ترین ئه‌ندامێ كۆمه‌ڵگه‌هێ ل عیڕاقێ هه‌ست ب دابه‌شبوونا سیاسی و ئابووری و جڤاكی و نه‌ته‌واتی و جوگرافی و كه‌لتۆری و بگره هه‌تا ئه‌خڵاقی و ئولی ژی دكه‌ت, ئه‌ڤ دابه‌شبوونه ژی ژ نشكاڤه نه‌هاتیه, چ دیروَك ژی ژ نشكاڤه ناهێنه خوڵقاندن, له‌وڕا سیاسه‌تمه‌دار و ڤه‌كۆله‌رێن ئه‌مریكی ده‌مه‌ك درێژه گه‌هشتینه وێ ڕاستیێ كو دابه‌شكرنا عیراقا نهو بۆ سێ كیانێن سه‌ربخوه و ئازاد باشترین و ئه‌قلانیترین چاره‌سه‌ره بۆ هه‌رسێ پێكهاتێن سه‌ره‌كیێن عیراقا سایكس پیكوَیا دێرین و به‌رهه‌ڤیكرن ژبوَ په‌یمانامه‌یه‌ك نوو ئانكو سایكس پیكوَیه‌ك نوو. (هێنری كیسنجه‌ر) هزرمه‌ندێ ستراتیژی و كه‌ڤنه وه‌زیرێ ده‌رڤه‌ی ئه‌مریكا ئێكه‌مین كه‌س بوو ل ساڵا (2006) ێ چاره‌نڤیسا عیڕاقێ وه‌كی یا یوگوَسلاڤیا د شوبهاند, هه‌رچه‌ند سڕبی و كرواتی نه وه‌كی تورك و فارسان هزر دكر!! پاشی (جوَن بایدن) ل ئایارا (2014) ێ هزرا دابه‌شكرنا عیراقێ بوَ سێ ویلایه‌تێن خودان ئوَتوَنوَمی ڕاگه‌هاند. ئیروَ هزرا دابه‌شكرنا عیراقێ یا بوویه پیڤه‌ره‌ك ژبوَ سه‌ركه‌فتنا ڕوَژئاڤا د چه‌مك و تێگه‌ها دابه‌شكرنا وه‌ڵاتێن دن ل ڕوَژهه‌ڵاتا ناڤین, مینا سووریا و یه‌مه‌نێ و لیبیا و هه‌تا ڕاده‌كێ ئیران و سعودیێ و توركیا و كه‌نداڤێ عه‌ره‌بی. ڕه‌نگه دابه‌شبوونا عیراقێ گه‌له‌ك ئاریشه و كریز هه‌بن, لێ د هه‌مان ده‌مدا مفایێن وێ زێده‌ترن. ڕاسته كو ده‌وله‌تێن جیران دژی ئه‌ڤێ دابه‌شبوونێ, چونكی ئه‌و ژی خودانێن هه‌ر هه‌مان پێكهاته‌ێن نه‌ته‌واتی و ئۆلینه و پێدڤیه خوه ژبوَ هه‌رهه‌مان حاله‌تی به‌رهه‌ڤ بكه‌ن. لێ گرنگرترین مفایێن وێ دووماهیهاتنا ململانێ یه ل سه‌ر ده‌ستهه‌ڵاتا ناڤه‌ند و هه‌ر لایه‌ك دێ سازیێن دیمۆكراسیێن خوه ئاڤاكه‌ت. (ئالان تۆبۆل) نڤیسه‌ر و یاساناسێ ئه‌مریكی دبێژیت: پشتی شه‌ڕێ جیهانیێ دووێ هژمارا ده‌وله‌تێن جیهانێ (74) ده‌وله‌تبوون ل دووڤدا بوون (193) ده‌وله‌ت, گه‌لوَ ما چ دبیت هه‌كه سێ ده‌وله‌تێن دن زێده‌ببن. ئه‌ڤه فه‌لسه‌فه و هزرو بۆچوون و عه‌قلیه‌تا ئه‌مریكایه ژ بوَ ئاینده‌یا ڕوَژهه‌ڵاتا ناڤین.. !! ئه‌ڤجا به‌غدا بكه‌ڤیت ئان نه‌كه‌ڤیت, دڤێت شیعه‌ستان بهێنه ڕایێ و سونه‌ستان و كوردستانێ ب جیرانێ خوه بزانن و سونه‌ستان ژی كوردستان و شیعه‌ستانێ ب ده‌وله‌ت بزانن.
