دێ چ کەی دا نوشدار چو تشتا ل تە نەڤەشێریت؟
ئەڤرۆ نیوز:
دەمێ نەخۆش دچیتە د کلینیکا نوشداری ڤە و ھەتا نەخوش جلکان ل بەر خو دکەت بۆ پشکنینێ و دوبارە جلکێن خۆ بکەتە ل بەرخۆ و دیسان چوون بۆ گرتنا تیشک و پشکنینێن تاقیگەھێ و دوبارە ڤەگەریان بۆ نوشداری دا بەرێ خو بدەتێ کا چ ل نەخوشی قەومی یە و دەرمانان بدەتێ، ئەڤە ھەموو گەلەک وەختی دکوژن و ل دەمێ ئەم ڤەدگەرینە مال گەلەک پرسیار دمیننە د سەرێ مە دا کو مە یێن ژبیرکرین ژ نوشداری بکەین و نوشداری ژی نەگوتینە مە و دبیت ژئەگەرێ ڤێ چەندێ نەخوش گەلەک خەلەتیان بکەت و ژیانا خو بێخیتە دمەترسیێ دا، بۆ نموونە نەزانیت کا چەوان دەرمانان ب کاربینیت یان چ تشتی بخوت و نەخوت، یان تێکەلیا کێ بکەت و چاوا چاڤدێریا خۆ بکەت و …ھتد.
نەخۆش پێدڤیە بزانیت دێ چ بێژیتە نوشداری ل دەمێ دچیتە ل دەڤ وی نە ب تنێ ل کلینیکا تایبەت، بەلکو ھەتا ل نەخوشخانە و بنگەھێن ساخلەمیێ ژی، داکو نەچار نەببیت دوبارە و سێبارە قەستا نوشداری بکەتەڤە.
رەنگە ئەو تشتێن تو ژبیردکەی بێژیە نوشداری گەلەک گرنگیا خۆ ل دەڤ نەبیت، بەلێ بزانە ئەوان نیشانێن سڤکێن تو ھزر ژێ دکەی، یان ھەست پێ دکەی، دبیت د سڤک بن د دیتنا تەدا، بەلێ بۆ نوشداری گەلەک د گرنگن و نەدوورە جھێ مەترسیێ بن.
ل ڤێرێ من دڤیا ئەز ئیشارەتێ ب تشتەکی بدەم، ئەوژی ھەبوونا ھەڤکاریێ یە دناڤبەرا نەخوشی و نوشداری دا، چ ئەڤ ھەڤکاریە ب چوونا کلینیکێ بیت، یانژی ب رێکا پەیوەندیەکا تێلەفونێ بیت.
ھەر چەندە گەلەک زەحمەتە ئەڤ پەیوەندیە د ھندەک دەلیڤەیان دا یا باش نەبیت و ل بەر نوشداری ژی ب زەحمەت بکەڤیت کو تشتەکی ژ نەخوشیێ بزانیت، بەلێ ھەر چاوابیت دەرگەھەکە بۆ وێ چەندێ کو نەخوش تشتەکی ژ خۆ بزانیت و ھەکە پێدڤی کر قەستا نوشداری بکەت.
دکتور (دافیس لیو ) نوشدارێ تایبەتمەندێ خێزانێ و ئەندامێ بەردەوامێ کومەلا پزیشکی ل باژێرێ ساکرامنتو ل ویلایەتا کالیفورنیا دیاردکەت کو ھەر کەسەکی پێدڤی ب ھندەک پێزانینا ھەیە و دیاردکەت کو پێدڤیە مرۆڤ رۆژا ژ دایکبوونا خۆ بکەتە رۆژەکا نوو بۆ ساخلەمیا خۆ و دبێژیت”ھندەک پرسیاران ل دور ساخلەمیا خۆ ل خۆ بکە، بۆ نموونە، ئەرێ ژیێ تە گەھشتیە قوناغەکێ کو تیشکێ بۆ مەمکێن خۆ بگری یان نازوورەکا گشتی بگری بۆ پشت راست بوون ژ ساخلەمیا خۆ و قولونێ ب شێوەیەکێ تایبەتی”.
ئەرێ تە پلانەک بۆ ھەلسەنگاندنا ساخلەمیا خو دانایە و تو ل دووڤ نەچبی؟ بۆ بەرسڤدانا ڤان پرسیاران دێ رەوشا ساخلەمیا خۆ ل بەرچاڤ دانی و دێ نەچاربی گرنگیێ بدەیێ و ھەروەسان دیاردکەت کو دەمێ مرۆڤ سەرەدانا نوشداری دکەت، بەری بچیتە دکلینیکا ویڤە ھەموو پرسیارێن خۆ بنڤیسیت و ھەر ھزرەکا وی ھەبیت ب دەلیڤە بزانیت کو بێژیتە نوشدارێ خۆ، ژبۆ پاراستنا ساخلەمیا تە پێدڤیە ھەموو پرسیارێن تە د روھن بن و ھەر تستەکێ دختوری گوتە تە بلا باش بۆ تە شروڤەبکەت.
