دەربازبوونا تیما مە دەستكەفتە بۆ وەرزشا پارێزگەها دهۆكێ
د دیدارەكا تایبەت دا سەرۆكێ یانەیا تەناهی كەیفخوەشییا خوە ب دەربازبوونا تیما تەپا پێی یا یانەیێ بۆ خولا پلا ئێكا كوردستانێ دیار كر و ئەڤ دەربازبوونە ب دەستكەفت بۆ گشت وەرزشا پارێزگەها دهۆكێ دا زانین و پێنگاڤە بۆ زێدەتر پێشئێخستنا وەرزشێ.
زێدەتر جاسم شەعبان بۆ رۆژنامەیا ئەڤرۆ گۆت: پشتی وەرزەكێ ب زەحمەت و پری ئاستەنگ سەرباری بارێ دارایی یێ گران كارگێریا یانەیێ ب هەردو مللان كار دكر پێخەمەت بۆ وەرزێ ئەڤ سالە تیما مە یا تەپا پێی نە بتنێ بەرهەڤ بیت بەلكو رژد بیت بۆ دەربازبوونێ ژ خولا پلا دو بەر ب پلا ئێكێ، ئەڤچەندە ژی ب كارەكێ كۆم هاتە كرن یێن كارگێری، كادرێ راهێنانێ و یاریزانان و پشتەڤانیا بەردەوام یا بەرێز ئامینا زكری ئەنداما مەكتەب سیاسی یا پارتی دیموكراتی كوردستان و رۆلێ بەرێز د. عەلی تەتەر پارێزگارێ دهۆكێ ژی ناهێتە ژبیركرن، هەرچەندە ئەو كاودانێن دارایی كو كارتیكرنا خوە ل سەر تیمێ دكر لێ وەكو كارگێری مە بزاڤ دكرن چو كێماسی نەمینن پێخەمەت هزرا یاریزانی د یاریێ دا بیت، ل دووماهیێ ژی بەرهەمێ بهنفرەهی و رژدی دژی زەحمەتێ و گڤاشتێن بەردەوام و ئەو ئاستەنگێن كەڤتینە د ڕێكێ دا ئەم شیاین دەربازبكەین و بگەهینە ئارمانجا خوە.
هەروەسان ناڤهاتی ئەوچەندە ژی دیار كر كو دەربازبوونا تیما تەناهی نەبتنێ دەستكەفتە بۆ یانەیێ و گۆت: ژبەركو یانەیا تەناهی نوونەرا پارێزگەها دهۆكێ یە لەوما ئەڤ دەستكەفتە بۆ هەمی وەرزشڤان و خەلكێ پارێزگەهێ یە، د خولا پلا ئێك دا ب هەڤالینییا یانەیا سێمێلێ ئەم دێ پێكڤە بۆ وەرزێ نوو نوونەرێن پارێزگەهێ پشكداریێ كەین و یا گرنگ ئەوە گەشبینی بۆ یاریزانێن پارێزگەهێ پەیداكرییە ژبۆ پشكداریێ د خولێ دا و ئەڤە ژی دەلیڤەكا باشە پشتی كو ل وەرزێ بۆری بتنێ یانەیا سێمێلێ بوو ئەڤ سالە ئەم بووینە دو یانە، ب هیڤییا وێ یەكێ نە لایەنێن پەیوەندیدار پشتەڤانییا ڤێ تیمێ ب كورێن باژێرێ دهۆكێ بكەن و ئەڤچەندە ژی پێنگاڤەكا مەزنە بۆ پێشئێخستنا وەرزشا پارێزگەها دهۆكێ.
