دەرسۆکا کوردی
ژیوارێ مرۆڤ تێدە ڕادبت و دژیت، دەستەکی مەزن د ئاوایێ گشتییێ ژین و ژیارا مرۆڤیدە ھەیە، ھەتا ڕاپێچانا مرۆڤی ژی (جلکێن مرۆڤ دکتە بەر خوە) بەر و بەرھەمێ کارلێکرنا سروشتێ وی ژینگەە و ژیوارییە. بێ گومان گەلەک ھۆکار و پالدەر ل پشت تایبەتمەندییا جلکێ ڤێ دەڤەرێ ژ یێ وا ھە ھەنە و گەلەک سەدەم ل پشت نەوەکھەڤی و جوداھییا وانن، لێ د گەل ھندێ ژی خالێن ھەڤپشک ژی د ناڤبەرا واندە ھەنە کو پترییا وان بۆ نێزیکاتی یان ئێکاتییا سەرەکانی و ژێدەرێن چاندا وان ژیواران ڤەدگەڕن. ئەگەر ئەم جەمەدانی یان دەرسۆکا کورد د ئاڤێنە سەرێ خوە وەک نموونەیەک وەربگرن، ئەم دێ بینن کو ئەگەرێ سەرەکییێ گرێدانێ ب پلەیا سەرەکی بۆ ژیوار و دیرۆکا دەڤەرێ دزڤڕت. گرنگییا ڕاپێچانا سەری د ئیسلامێدە و ب تایبەتی د نڤێژکرنێدە و وان فەرمۆدەیێن پەسنا دەرسۆکا پێغەمبەری دایین کو لفکا وێ ب پاتکێ و ناڤملاندە شۆڕ دبوو، دیسا ڕاپێچانا موسلمانان ھەر ژ دەستپێکا پەیدابوونا ئیسلامێ ھەتا ب دووماھیھاتنا دەولەتا ئۆسمانی، بێ گومان ڤان ھەمییان کارلێکرنا خوە یا بەرچاڤ د ڕاپێچانا مە کورداندە ژی ھەیە وەک مللەتەک موسلمان. ئەڤە ھندێ دگەھینت کو ناڤبڕێن ستوور د ناڤبەرا جلکێن چو مللەتاندە نینن، بەلکو ھەر مللەتەک ناڤبەر ناڤبەر و ل گۆر کاودانێن ژین و ژیارا خوە و ڕێ و ڕەسم و ڕەوشت و بیر و باوەرێن خوە، جلکێن خوە ژی دگوھۆڕت و ھندەک جاران ئەو گوھۆڕین ب حوکمێ بۆرینا وەخت و زەمانان قالب و کراسێ تایبەتمەندییەکێ دگرت، ئەو مللەت پێ ژ غەیری خوە جودا دبت. ئەڤە د چارچۆڤێ چاندا مرۆڤاتییێدە دیاردەیەک گشتگیر و ئاسایییە و نابتە سەدەما پێتیکرنا تایبەتمەندییێن چو مللەتان، بەلکو ئێکاتییا ژێدەر و سەرۆکانییا چاندا گشتیا مرۆڤاتیێ پەسەند دکەت.
