دەرمالەیێن مامۆستایێن ئایینی دێ هێنە زێدەكرن
هەولێر، قائید میرۆ:
پەیڤدارێ وەزارەتا ئەوقاف و كاروبارێن ئایینی خویاكر، د دەمێ نوكە دا دەرمالەیەكێ 250 هزار دیناری بۆ مامۆستایێن ئایینی یێن خۆبەخش هاتیە دیاركرن و بزاڤ دهێنە كرن ئەو دەرمالە بهێتە زێدەكرن.
نەبەز ئیسماعیل، پەیڤدارێ وەزارەتا ئەوقاف و كاروبارێن ئایینی بۆ رۆژناما ئەڤرۆ دیاركر، ل سەردەمێ كابینەیا نەهێ یا حوكمەتا هەرێما كوردستانێ 439 مزگەفت و 45 بنگەهێن ژ بەركرنا قورئانێ هاتینە ئاڤاكرن و هەژمارەك مزگەڤت ژی هەنە هێشتا نەهاتینە تەمامكرن و گۆت: «ل سەرانسەری هەرێما كوردستانێ شەش هزار و 300 مزگەفت هەنە و گوتارا ئەینیێ ل سێ هزار و 450 مزگەفتان دهێتە پێشكێشكرن، هەژمارا بنگەهێن ژ بەركرنا قورئانێ ژی 130 بنگەهن».
نەبەز ئیسماعیل گۆتژی: «ل هەرێما كوردستانێ سێ هزار مامۆستایێن ئایینی هەنە و هاتینە دامەزراندن وەكی فەرمانبەرێن وەزارەتا ئەوقافێ، هەروەسا هزار و 500 مامۆستایێن خۆبەخش هەنە و هەیڤانە دەرمالەیەكێ 250 هزار ژ لایێ حوكمەتا هەرێما كوردستانێ بۆ هاتیە دیاركرن و بزاڤ دهێنە كرن دەرمالەیێ مامۆستایێن ئایینی بهێتە زێدەكرن».
