دەرمانێن قەلەوکرنێ کچەک نەچارکر دو نشتەرگەریان بکەت
د. سەربەست سەلام پیرو *
نەخۆشەکا گەنج ژ ئەگەرێ بکارئێنانا دەرمانێن قەلەوکرنێ نەچاری گۆهورینا هەردو سەرێ رانی بوویە.
نەخۆشەکا ٢٠ سالی بو دەمێ دو هەیڤان گازندە ژ هەردو گەهێن رانی دکرن، هەروەسا ب دروستی نە دشیا هاتن و چوونێ بکەت. پشتی چەندین پرسیار ژ نەخوشی هاتینەکرن، دیاربوو کو نەخوش بو دەمێ ٢ هەیڤان دەرمانێن قەلەوکرنێ بکاردئینان بێ ئاموژگاریا نۆشداران.
پشتی پشکنینا رەنینا موگناتیسی بو هاتیەکرن. وەسا دیاربوو کو ب دروستی خوین نا گەهیتە سەرێ هەستیێن وێ یێن رانی و هەردو گەهـ ژناڤچووینە، و ئەڤ چەندە بوویە ئەگەرێ دروستکرنا ئێشانێ و ئاستەنگان بو هاتن و چوونێ. هەر ژبەر ڤێ چەندێ نەساخ پێدڤی ب نشەرگەریا گهورینا هەردو گەهێن رانی یە د ژیەک هوسا بچویک دا. و ئەگەرێ سەرەکی یێ ئەڤێ چەندێ ئەڤ دەرمانێ قەلەوکرنێ بوو، چنکو پتریا دەرمانێن قەلەوکرنێ پێکهاتیە ژ مادەیێ (Steroid) و گەلەک بکارئینانا ئەڤی جورە مادەی بو دەمەک گەلەک درێژ دبیتە ئەگەرێ دروستکرنا گەلەک ئاریشان ژ وان ئاریشان ژناڤچوونا سەرێن هەستی ژ ئەگەرێ کێم گەهشتنا خوینێ.
پتریا ڤان جورە دەرمانا ب شێوەیێن ئونلاین یانژی ل مارکێتان دهێنە فروتن و هوسا دهێتە دیارکرن کو ئەڤ دەرمانە ١٠٠٪ د سروشتینە. ب چ رەنگان ئەڤ جورێن دەرمانان چاڤدێریا ساخلەمیێ لسەر نینە.
ب چ رەنگان نابیت بێ ئاموژگاریێن نۆشداری دەرمان بهێنە بکارئێنان تایبەتی ئەڤ جورە دەرمانە یێن بو قەلەوکرنێ دهێنە بکارئینان.
* نوژدارێ نیشتەجێ دێرین – نشتەرگەریا هەستی و شکەستن
