دەرمانێ پیراتیێ
رەمەزان ئیسماعیل گەرەگوهی
ژیانا مرۆڤی ژ زارۆكیێ دەستپێدكەت و دچەند قووناغان ڕا دەرباز دبیت، هەتا دگەهیتە قووناغا دووماهیێ كو ئەو ژی پیراتییە و وی دەمی ژی ژیان پتر ل بەر دلێ مرۆڤی شرین دبیت و حەزدكەت هێشتا بژیت.
لێ دەمێ مرۆڤ پرسیارێ ژ خەلكێ دی، نەخاسمە كەسێن ب ناڤسالڤەچوی و دانعەمر دكەت و دبێژیتێ:خۆشیا مرۆڤی پتر د چ دایە؟ دێ بەرسڤ و دیتنێن جودا جودا بۆ ژیانێ و خۆشیا وێ هەبن و هەر كەسەك دێ شرۆڤەیەكا جودا ژ كەسێن دی بۆ هەبیت، بو نموونە: هندەك دێ هەبن گەلەك گرنگیێ ددەنە هەڤالێن خۆ و ب چاڤەكێ مەزن بەرێ خوە ددەنە وان و هیڤیا وان یا ئێكێ ئەوە كو هەڤالێن باش و وەفادار هەبن و هندەكێن دی گەلەك گرنگیێ ب كەس و كارێن خۆ ب تایبەت زارۆكان ددەن و حەزژێ دكەن و هەتا كو زارۆكی ب فێقیێ مالێ ناڤ دكەن و هندەك ژی كەدخودایێ و مال و سامانی دپەژرینن و دبێژن: مال و سامان بۆ مرۆڤی هەموو خۆشی و سەرفرازی و هەموو تشتە، هندەكێن دی ژی پتر فۆكسا خۆ دئێخنە سەر ساخلەمیا مرۆڤی و هزردكەن كو ئەو ژ هەموو تشتێن دی بو ژیانێ گرنگنترە و ئەو كەسێ ساخلەمیەكا باش هەبیت بلا چو تشتێ دی نەبیت.
دبێژن: دەمێ ژیێ حاكمەكێ خودان كۆچك و دیوان و دەستهەلات دگەهیتە (٦٠ هەتا ٧٠) سالیێ و پیراتی ب سەردا هێت، دبێژیتە ڕوونشتیێن كۆچكێ: كی دێ بۆ من دەرمانێ پیراتیێ پەیداكەت و ئینیت؟ وەزیرەكێ وی دبژیت: ئەز دێ چم بۆ تەلێ گەڕیێم و دچیت و دو زەلامێن برا یێن ئێك دبینیت، سەرێ برایێ بچووك یێ سپی بووی و مویەكێ ڕەش تێ نەمایە و وەكی پیرەمێران دیاردكەت، چونكی هەڤژینا وی یا نە گوهدار و پتپتی و ناڤچاڤ گرێ یە و سەرێ برایێ مەزن یێ ڕەشە و مویەكێ سپی نەكەفتیێ و مینا گەنجان دیاردكەت، چونكی هەڤژینا وی یا كەیفخۆش و ڤەكری و گوهدارە.
پشتی وەزیر دزڤڕیتەڤە و ڤێ سەرهاتیێ بۆ حاكمی و خەلكێ كۆچكێ ڤەدگێڕیت، حاكم دبێژیت: تۆ ڕاست دبێژی هەڤژینا باش و بگڕنژین و گوهدار دەرمانێ پیراتیێ یە و پێدڤیە دەمێ هەڤژین پیر دبن گەلەك ڕێزێ ل ئێكود و بگرن و خەلكەكێ دی ژی ڕێزێ ل وان بگرن و هەموو دەما دلخۆش بكەن، داكو هەست ب بێ خودانیێ نەكەن و دا هەردەم ب هیڤی و ئومێد و خۆشی بژین.
