دەرگەهـێ پێشكێشكرنا كورسیێن ماستەر و دكتۆرایێ هاتە ڤەكرن
ئەڤرۆ
هەولێر، سولین
وەزیرێ خواندنا بلند و ڤەكۆلینێن زانستی رادگەهینیت، دەرگەهـێ پێشكێشكرنا كورسیێن ماستەر و دكتۆرایێ دوهی 2/4/2023 هاتە ڤەكرن و شەش هزار كورسی ژی ژ بۆ ڤێ چەندێ هاتینە دابینكرن.
ئارام محمەد، وەزیرێ خواندنا بلند و ڤەكۆلینێن زانستی ل حوكمەتا هەرێما كوردستانێ بۆ رۆژناما ئەڤرۆ گۆت: «داخوازكەرێن ماستەر و دكتۆرایێ هەر ژ رۆژا 2ی نیسانێ هەتا 18ی گۆلانا 2023 دشێن داخوازیێن خوە ژ پێشكێش بكەن، ژ بەر مەها رەمەزانێ مە ئەڤ دەمە ژ بۆ داخوازكەران درێژ كر، دیسا ل رۆژا 29/5/2023 ئەزموون دێ هێنە ئەنجامدان».
گۆتژی: «د دەمێ پێشكێشكرنا داخوازیا ماستەر و دكتۆرایێ دا گوژمێ 200 هەتا 250 هزار دینار ژ هەر كەسەكی دێ هێنە وەرگرتن، ئەگەر ناڤێ وی كەسی نەهێت ژی ئەو پارە بۆ ناهێتە ڤەگەراندن».
ناڤهاتی ئاشكرا ژی كر، ئەڤ پرۆسە ژ بۆ سێ بازنان هاتیە پارڤەكرن، ئێك: ژ بۆ وەزارەتا خواندنا بلند و مامۆستا و فەرمانبەر و وەزارەتێیە، دو: ژ بۆ ناڤەندێن دی یێن حوكمەتا هەرێما كوردستانێیە و سێ: ژ بۆ هەمی وەلاتیێن كوردستانێ و پارالێلە.
