دەرھێنەرەکێ دھۆکێ نامەکێ ئاراستەی سینەما ئەمریکی دکەت
ئەڤرۆ نيوز:
شەوکەت ئەمین کورکی، دەرھێنەرێ فلمێ (بیرەوەریێن سەربەری) نامەکا ڤەکری ئاراستەی (کریستۆفەر داد) سیناتۆرێ بەرێ یێ ئەمریکێ و سەرۆکێ نوکە یێ جڤاتا سینەمایێ ل وی وەلاتی کر، و دبێژیت: بۆ دەمێ سێ سالانە نەشیایمە چو کارێن ھونەری ئەنجام بدەم، چونکو کارێن ھونەری ب تەمامی ل کوردستانیً راوەستاینە و ھەر چو داھات نینە، دیسان وەک ھەوە ل دووماھیا فلمێ من دیتی من پشکەک ژ ئازارێن ھونەرمەندێن کورد دیارکربوون و ئەڤ ئازارە ھەر ژ دەمێ رژێما بۆری ھەبووینە و ھەتا نوکە د بەردەوامن.
ھەروەسا دبێژیت: ھوون د ئاگەھدارن کو بۆ دەمێ سێ سالانە کوردستان یا بەرامبەر مەزنترین و درندەترین ھێزا تیرۆرستی ل سەر عەردی شەری دکەت و گەلەک شەھید و بریندار مللەتێ کورد داینە سەخمەراتی مرۆڤایەتی و پاراستنا ئاخا خوە، و کوردستان بوویە جھێ ڤەحوەندنا نێزیکی دو ملیۆن ئاواران، و پشتی ھێزا داعش شکاندی مللەتێ من ب ئازادانە چوونە سەر سندوقێن دەنگدانێ و پتر ژ 92% دەنگ بۆ سەربەخوەیا کوردستانێ دا، لێ پشتی دەمەکێ کێم کوردستان کەفتە بن ھێرشان ڤە، و ب مخابنی ڤە جیھانێ ھەموویێ ل سەر رەفتارێن عیراقێ وەلاتێن جیران کو دژی ھەرێما کوردستانێ رابووینە خوە بێ دەنگ کرینە.
