دەزگەهێن ئێمناهیێ د خزمەتا خەلكی دا د سەرفرازن
عەمەر هەرگۆشی
جهێ شانازیێ یە كو چاڤێ حوكمەتا هەرێمێ د وارێ ئاڤەدانكرنێ و پێكئینانا جڤاكەكا سیڤیل و پێشكەفتی دا سەركەفتنێن مەزن ب دەستڤەئیناینە، هەروەسا د وارێ هەوالگەری و ئاسایشێ و پاراستنا گەلێ كوردستانێ دا یا شیای رۆلەكی پیرۆز و بەرچاڤ ببینیت.
ئەو دەستكەفتێن ڤێ دویماهیێ ل دژی تێكدەر و ب كرێگرتیێن ناڤخۆ و بیانی ب دەستڤەئینای جهێ شانازی و دلخۆشیا هەمی خەلكێ كوردستانێ یە، بۆ هەمی خەلكی دیاركەفت كو پلان و نیازا ناحەزێن كوردستانێ چەند د مەزن و ڤەشارتی بن ژ دەستێ پارێزەرێن وەلاتی دەربازنابن ل بن پێلێن هەورا دێ راكێشنە بەر دەمێ دادگەهێ و دێ گەهن سزایێن خۆ، هەلبەت ئەڤا ڤێ جارێ دەزگەهێن حوكمەتا هەرێمێ پێ رابی كو شیان پشتراستیەكێ بدەتە هەڤوەلاتیان كو ئێدی گەلێ كوردستانێ یێ د دەستەكێ ئەمین و باوەرپێكری دا كو پلانێن دوژمنان هێژ د ناڤ هناڤێن وان دا و بەری ژ دایكبوونێ دێ ژناڤبەن و پەرچقینن، ئەو پلانا ل دژی پایتەختێ هەرێمێ و گەلێ كوردستانێ هەی و ب ڤێ زیانێن كێم شیای ژ ناڤ ببەن، ئەڤە كارێ وان پێێشمەرگە و وێ حزبێ یە كو باوەریەكا موكم ب رزگاری و ئازادیا گەلێ خۆ هەی و هەمێ جاران بۆ پاراستنا هەرێمێ دەستكەفتیێن كوردستانێ گیان ل سەر دەست و د چاڤ ڤەكرینە كو وانەكێ نیشا دوژمنێن گەلێ كوردستانێ و كرێگتیێن وان بدەن كو سەرشۆرێ دونیایێ و قیامەتێ ببن.
پێدڤیە ئەڤرۆ هەر هەڤوەلاتیەكێ خۆدان وژدانێ كوردستانێ خۆ ب بەرپرسیار بزانیت ببیتە چەپەرەك ل گەل دەستگەهێن تەناهیێ كو بشێن زویتر و ئاسانتر ل سەر پلانێن دوژمنان دا زال ببن و مزگێنیێن خۆشتر بدەنە هەڤوەلاتیان كو بەرێ رەنج و خوینا شەهیدان دێ یی پاراستی بیت و ئەوێن ل ئەركێ خۆ یێ جاشایەتیێ و وەلاتفرۆشیێ ژی تێر نەبیت دێ كەنە پەند و عیبرەت بۆ هەمی ڤانا ئەڤێن هزرا جاشایەتیێ هێژ د مەژیێ وان دا مای.
سوپاس بۆ خۆدێ كو رێبازا شەهیدان و كوردایەتێ ل ژێر رێنمایی و دادپەروەریا سەرۆك بارزانی ڤێ جارێ ژی شییا هیڤیێن خۆدان شەهیدان و هەمی پارێزەرێن وەلاتی مەزن بكەت كو ئێدی هەمی دوژمن و ناحەزێن خاكا پیرۆزا كوردستانێ نەكارین ل هەنبەر خۆڕاگریا كوردان ل سەر پییا رابوەستن و ل هەنبەر دەستێ ب هێزێ ئاسایشا هەرێمێ خۆ ل سەر پیا بگرن.
ئێكرێزی و تەباییا گەلێ كوردستانێ ئارمانجا مەزنا پارتییە ژ بەر ڤێ چەندێ ئەڤێن دڤێن كوردستانێ داگیر بكەن و حوكمەتا هەرێمێ نەهێلن بەرییا هەر تشتەكی ئەو دخوازن ئێكرێزی و تاباییا كوردان نەهێلن و تووشی شەڕ و دوبەرەكانیێ بكەن و پاشی ب ساناهیتر شەڕێ دژی گەلێ كورستانێ بدومینن.
بكارئینانا كیمیا و ئەنفالان و كاڤلكرنا گوندان؛ نەشیاینە بۆ دەمەكی كێم ژێ ئاگرێ شۆرشا كوردان بتەمرینن. نوكە ژی ب هاریاكریا كەڤنە جاشان بلا چ لایەن دلێ خۆ خۆش نەكەن كو دێ شێن بۆ چركەساتەكێ ژی پارتی و خۆزیكێن گەلێ كوردستانێ ژێك جودا كەن و پێگێ قایمێ هەرێما كوردستانێ ژی لەق كەن.
