دەزگەهێن چاپكرنا كتێبان و هندەک تێبینی
عسمەت محەمەد بەدەل
هندەك ژ سازی و دەزگەهێن رەوشەنبیری یێن سەر ب حوكمەتا هەرێما كوردستانێ و ئالییێن سیاسییێن هەرێمێڤە نەمازە ل دهۆكێ وەسا هزر دكن كو ب تنێ چاپكرنا كتێبێن سیاسییێن گرێدایی بزاڤا رزگاریخوازا كوردی و شۆرشێن كوردی و كتێبێن ل سەر ژیانا سەركردە و خەباتكەرێن د ناڤ ڤان شۆرشاندا خزمەتا گەلێ كورد و كێشەیێن وی دكت، و وەسا ددانن كو چاپكرنا كتێبەكا فەلسەفی یان دەرۆنناسی یان ئەدەبی یان زانستی چ نڤیسین یان وەرگێران چو خزمەتێ ب گەلێ كورد نا گەهینت. ل سەر ڤێ بنیاتێژی ئەوان سازییان شەرت و مەرج بۆ چاپكرنا كتێبان داناینە كو دڤیابت مژارا وێ ل سەر كێشەیێن نەتەوەیی بت، هەروەكی ئەو بێژن كو كێشەیێن زمانی و فیلۆسۆفیایێ و دەرۆنناسی و جڤاكی و زانستی و ئەدەبی و دیرۆكی و هەموو بیاڤێن دییێن رەوشەنبیری چو خزمەتێ نا گەهیننە جڤاكێ كوردی.
هەلبەت مەزنترین خزمەتا ب جڤاكێ كوردی بگەهت هۆشیاركرن و رەوشەنبیركرنا وییە، نەمازە بەرەبابێن نوو، كتێب ب هەموو بیاڤێن خوەڤە ئێك ژ گرنگترین ئالاڤێن رەوشەنبیریكرنا جڤاكییە و هەكەر قوتابخانە و پەیمانگەه و زانكۆیان ب دورستی بۆ بەلاڤەكرنا رەوشەنبیرییا خواندنێ ب كار بینن دێ باندۆرەكا مەزن ل سەر جڤاكی و هۆشیارییا وی هەبت.
ئەو دەزگەه و سازییە نزانن یان نەڤێن بزانن كو زەمانێ ئایدۆلۆجیایێ و پرۆپاگەندەیا درووشمان دەم ب سەرڤەچوویە و هەكەر مە بڤێت جڤاكەكی ساخلەم و رەوشەنبیر ئاڤا بكن دڤیابت گرنگییەكا مەزن بدنە چاپكرن و بەلاڤكرنا كتێبان و دیتنا وان رێیێن كو بەرێ گەنجان بدنە خواندنێ و دەست ب پرۆژەیەكێ مەزنێ وەرگێرانێ ژ زمانێن جیهانی بكن و پشتەڤانییەكا داراییا بێ سینۆر بۆ بكن.
وەرگێرانا بەرهەمێن فیلۆسۆفی و شاكارێن ئەدەبییێن جیهانی دێ خزمەتەكا مەزن گەهینتە زمانێ مە، رەوشەنبیرییا مە، جڤاكێ مە و نەتەوەیا مە. هەروەسا دێ ب ئاوایەكی ئێكسەر مفای گەهیننە قوتابییێن مە چ ل قوتابخانەیان یان ل پەیمانگەه و زانكۆیان چونكی ئارێشەیا ژ هەموویان مەزنتر ل بەر وان نەبوونا ژێدەرانە ب زمانێ كوردی نەمازە ئەو ژ بلی زمانێ كوردی و ژ كوردییێ ژی دەڤۆكا بەهدینی چو زمانێ دی نزانن.
هەموو بیاڤێن رەوشەنبیری گرنگن، دیرۆكا ملەتێ مە، ئەدەبێ مەیێ كلاسیك و یێ نوو، ژیاننامەیا سەركردە و رێبەرێن مە، لێ ئەڤە وێ چەندێ نا گەهینت كو ئەم بیاڤێن دی پشت گوه بێخن و گرنگییێ پێ نەدن.
داخوازا مە ژ وان دەزگەهان ژ ڤێ بریارا خوە لێڤەبن و دەرگەهی بۆ چاپكرنا هەموو جوونێن كتێبان ڤەكن و چاوا پشتەڤانییا دارایی بۆ گەلەك بیاڤێن دی ڤەكرییە پێدڤییە بۆ بیاڤێ رەوشەنبیری و هونەریژی ڤەكری بت.
