دەزگەهێ خێرخوازی یێ بارزانی ب كوژمێ٤١ ملیار دیناران پرۆژەیێن خێرخوازی ئەنجامداینە
دلۆڤان ئاكرەیی
سەرۆكێ دەزگەهێ خێرخوازی یێ بارزانی دیار كر، سەرەڕای ئاستەنگ و ئالینگارییێن جۆراوجۆر یێن سالا 2025ێ، دەزگەهێ وان شیایە كار و پڕۆژەیێن مەزن ل سەرانسەری هەرێما كوردستانێ ئەنجام بدەت و ب كوژمێ پتر ژ 41 ملیار دیناران، 161 پڕۆژەیێن ستراتیژی د سەكتەرێن جودا جودا دا بۆ خزمەتا وەلاتیان و ئاواران جێبەجێ بكەت.
موسا ئەحمەد، سەرۆكێ دەزگەهێ خێرخوازی یێ بارزانی بۆ رۆژنامەیا ئەڤرۆ گۆت: رەوشا مرۆڤی یا ئاواران د سالا ٢٠٢٥ دا د رەوشەكا سەخت د ناڤ 27 كەمپێن هەرێما كوردستانێ دا دەرباز بوویە كو ئەگەرێ وێ بۆ كێمبوونا بەرچاڤ یا هاریكارییێن نێڤدەولەتی و بێباكییا حوكمەتا ئیراقێ و وەزارەتا كۆچ و كۆچبەران دێ هێتە ڤەگەراندن، كو وەك پێدڤی بەرپرسیارەتییا خۆ بەرامبەر هاریكارییا ئاواران جێبەجێ نەكریە و گۆڕانكارییێن ئیدارەیا ئەمریكا ژی بوویە ئەگەرێ ڕاوەستاندنا پتر ژ 19 پڕۆژەیێن گرنگ د ناڤ كەمپان دا و ڤێ چەندێ ژی باندۆرەكا ڕاستەوخۆ ل سەر ژیانا خەلكی و كارێن دەزگەهێ وان دروست كریە كو ئەركێ برێڤەبرنا كەمپان ل سەر ملانە.
ناڤبری گۆت: د سالا بوری دا دەزگەهێ بارزانی د 10 سەكتەرێن جودا دا 161 پڕۆژە جێبجێكرینە، د كەرتی خوارنێ دا، 106,313 كارتۆنێن خوارنێ و 50,292 ژەمێن ئامادەكری د هەیڤا ڕەمەزانا پیرۆز دا هاتینە بەلاڤكرن، هەروەسا د كەرتێ پەروەردە و خزمەتگوزارییێن گشتی دا، 32 قوتابخانە هاتینە نوژەنكرن و سیستەمێ پێدڤی بۆ هاتیە دابینكرن، دگەل ڕایخستنا فەرشان بۆ 95 مزگەفتان و پووتەدانا تایبەت ب كەسێن خودان پێدڤیێن تایبەت و شیاندنەڤەیا ئالۆدەبوویێن ماددەیێن بێهۆشكەر.
سەرۆكێ دەزگەهێ خێرخوازی یێ بارزانی ئاشكراكر: تێچوونا پڕۆژەیێن ئەڤ سالە ب 41,702,286,000 دیناران دێ هێتە خەملاندن و دوپاتكر، وەك هەردەم ب گیانەكێ پێشمەرگانە دێ بەردەوام بین د خزمەتكرنا خەلكێ كوردستانێ دا و ئارمانجا وان یا سەرەكی بۆ ئەڤ سالە دێ پووتەدانا زێدەتر بیت ب كەرتێن پەروەردێ و ئاڤەدانكرن و بنیاتنانێ، هەروەسا سوپاسییا هەموو وان بەخشەر و هەڤپشكان كر یێن كو هاریكار بووین د سەرخستنا ڤێ كاروانا مرۆڤی دا.
